٠٨ يونيو ٢٠١١

مظاهرة الفلاحين النهارده

تحديث هام قبل ما تقرا التدوينة: يا ريت ماحدش يدخل يقول لي بيعطلوا البلد وعجلة الإنتاج وبيان الوزارة أقل ما يقال عنه انه مخزي! في كل بلاد العالم المحترمة الإضراب وسيلة مشروعة لإعلان المطالب ودول ناس بقالهم أكتر من ست شهور بيروحوا الوزارة يطالبوا بحقوقهم ومافيش حد سامعهم. اشمعنى مثلا لما شركة طيران زي بريتيش إيرويز تعمل إضراب في انجلترا وتشل حركة الطيران بحالها محدش بيمنعم!! وبتكون طريقة فض اعتصامهم هي الاستجابة لمطالبهم أو على الأقل مناقشتها!!

________________________________


النهاردة اكتشفت بالصدفة من نورا شلبي على تويتر ان الفلاحين بيتظاهروا في شارع القصر العيني مطالبين بحقوقهم. اللي وصلني ان معظم المطالب كانت متعلقة بإيجار الأراضي اللي اصبح فوق طاقة أي فلاح وبحق الفلاحين في امتلاك الاراضي اللي بيفلحوها.


سؤالي هو: ليه ماعرفناش عن المظاهرة دي من بدري؟ مين اللي نسق لها وليه ماحاولوش يتصلوا بالنشطاء عشان يحشدولها عشان الناس دول ما يتسابوش لوحدهم؟


اللي حصل ان عددهم كان قليل وما شاء الله العيسوي جامد في الأمن عندما يتعلق الأمر بالمظاهرات! الأمن المركزي نزل في كامل قوته وفض الاعتصام وبدأ يعتقل من الفلاحين.


والحقيقة دي مش غلطة الأمن بس. دي غلطتنا احنا كمان. عشان احنا مش هناك معاهم نحميهم بالكترة ونساندهم في المطالبة بحقوقهم المشروعة. وده بقى على فكرة مرتبط بمسألة حرب المواقع اللي اتكلمت عنها هنا واللي كتب عنها حسام الحملاوي فيما يخص استمرار الثورة في المصانع هنا.


من الآخر كده وعشان ما اطوّلش عليكم: لو ما رتبناش أولوياتنا ولو ما وقفناش جنب العمال والفلاحين اللي الثورة دي قامت عشان هم مش لاقيين ياكلوا وعيشيتهم عبارة عن ظلم في قهر في قرف، يبقى قولوا على الثورة دي ياللا السلامة.


وخليكم فاكرين ان لولا انضمام العمال والفلاحين في أواخر ايام الاعتصام للثورة ولولا تهديدهم بالدخول في إضراب مفتوح وعصيان مدني ماكانش مبارك مشي ولا شفيق مشي. لو بعناهم

النهاردة نبقى نستاهل اللي يجرالنا!


ملحوظة: تفتكروا لو كان العدد أكبر وكان في وسطهم نشطاء وصحفيين وناس تقدر تساعدهم في تنظيم نفسهم أثناء التظاهرة، تفتكروا كان قدر الأمن يتعامل معاهم بنفس الطريقة ويفض الاعتصام؟


اتفرجوا على صور نورا شلبي هنا: http://yfrog.com/h39uubtbj



هناك تعليقان (٢):

Laila يقول...

كلام صحيح مائة بالمائةفأنا دائما أشبه العمال والفلاحين بأنهم الأعمدة التي ترتفع البلاد علي أكتافها فان صحت صح البناء وان كانت ضعيفة وواهية انهار البناءوانهارت البلاد فان لم يكن لدينا الوعي الكافي بهذه الحقيقة والشعور بأن هؤلاء الناس قد عانوا من الاهمال والتهميش والمعاملة اللاانسانيةولا زالوا يعانون من هذا بعد الثورة أيضا فلنقل علي مصر السلام. لذلك يجب وضعهم في مكانهم الصحيح داخل الصورةوتوجيه الدعم لهم في كافة النواحي كي نضمن لهم حياة آدمية كريمة يستطيعون من خلالها الاشتراك بايجابية في بناء مصر.

BestItalianPizza يقول...

الشعب قام بالثورة .. الشعب يريد ادارة المرحلة الانتقالية .. لا يعارض هذا الا خائن أو عميل أو متواطئ أو فلول
الشعب قام بالثورة .. الشعب يريد ادارة المرحلة الانتقالية .. لا يعارض هذا الا خائن أو عميل أو متواطئ أو فلول