١٠ أكتوبر ٢٠٠٦

حازم شاهين.. وفرقة "مزيكا بس"

حازم شاهين... لما حاولت اتكلم عنه قبل كده ما عرفتش. وغالباً مش حاعرف دلوقتي كمان. ساعتها قلت "اللي بتقوله المزيكا اللي من القلب مش ممكن يقوله الكلام."

ساعتها ما كنتش لسه عرفت ان حازم كمان بيؤلف موسيقى وعنده مشروع موسيقي جاد إلى جانب فرقة "اسكندريللا" اللي بتقدم أعمال الشيخ سيد درويش والشيخ إمام ومؤخراً زياد الرحباني. طبعاً هو كان له تجارب سابقة مع التلحين والتأليف الموسيقي في أمسيات
زي"حاجات وحشاني" و"لازم تعيش المقاومة" والحمد لله الجمهور استقبله استقبال رائع. أذكر ان شريف نجيب قال لي حاجة عن حازم علقت معايا جداً بعد الأمسية اللي فاتت، قال ما معناه: "حاجة جميلة ان احنا أخيراً يبقى عندنا حاجة *بتاعتنا*" (صح يا شريف والا انا ذاكرتي خانتني؟) .. هو ده فعلا إحساسي بالضبط.. ان حازم *بتاعنا* بمعنى إنه جاي من عندنا . جاي من عند الشيخ سيد درويش والشيخ إمام وزياد وفي نفس الوقت ماهواش نفس الحاجة.. ومش واقع في فخ *تقليد القديم* ولا بيتاجر بسلعة *عصرنة القديم* وبالتالي تشويهه، زي ما كثير من الفرق بتعمل. حازم لما بيقدم القديم بيقدمه زي ما هو بقدر الإمكان.. ولما بيعمل جديد، بيبقى جديد بجد.

عايزين تسمعوا الجديد؟ الجديد ان حازم شاهين وهاني بدير(إيقاع فرقة اسكندريللا) ونوار(البيانيست) ومايلز دجاي (عازف الكونترباص اللي انضم مؤخراً لاسكندريللا) قرروا يعملوا فرقة *مزيكا بس*. للأسف المنتج اللبناني اللي تحمسلهم وقرر ينتجلهم ألبوم ما عجبهوش ان إسم الفرقة يبقى *مزيكا بس* لإنه في السوق العربية لما الإسم بيكون بالعامية المصرية الناس بتفتكر ان دي "موسيقى تجارية" (وكتر ألف خيرها بقى نانسي عجرم!). المهم الإسم بقى *مسار* وألبومهم الأول اتسجل بعنوان *العيش والملح*. الألبوم يشمل 4 مقطوعات من تأليف حازم وواحدة من تأليف نوار وواحدة من تأليف مايلز دجاي وارتجالات على أغنية لسيد درويش.


حفل إطلاق الألبوم حيكون يوم الأربعاء 18 أكتوبر في مسرح الجنينة، وده حيكون ضمن البرنامج اللي بتنظمه شركة الإنتاج والتوزيع اللبنانية لإطلاق أربع ألبومات جديدة من مصر لفتحي سلامة وفرقة الدور الأول ورياض عبد الجواد. مزيد من المعلومات عن هذا المشروع وعن مواعيد الحفلات على موقع المورد. الحفلات مجانية والاسطوانات متوفرة عند المدخل.







ده بالنسبة للمزيكا *بس*.. أما بقى آخر أخبار اسكندريللا فهي إنهم بعد تجربة ناجحة، قرروا يضموا بنتين معاهم في الفرقة هما آية حميدة والعبدة لله :) طبعا انا مش مغنية محترفة ويدوبك بافك الخط.. فماتتوقعوش كتير. لكن عايزة اقول لكم ان انا بالنسبة لي مجرد اني أكون جزء -ولو صغير- من التجربة الجميلة دي، محسسني بفخر واعتزاز وسعادة بالغة. حفلة اسكندريللا الجاية في ساقية الصاوي يوم 13 أكتوبر حيقدموا فيها أغاني جديدة منها حاجات بتاعتهم. لو خفيت من دور البرد الرهيب اللي عندي ان شاء الله ح اكون معاهم في الحفلة دي ولو ما خفيتش حكون في وسط الصالة باعدي الجمهور :)


وكل تجربة وكل محاولة وانتم طيبين...

هناك ٣١ تعليقًا:

shady يقول...

مبروك جداً
بجد خبر جميل

حسام يقول...

مبروك لحازم الاحبار الحلوة وربنا يوفقك ويوفقهم :)

عمرو عزت يقول...

دي أخبار هايلة جدا
الواجد نفسه من زمان يشتري اسطوانة مزيكا بجد من " بتاعتنا " دي

من أول مرة شفت حازم و هو ماسك العود حسيت ان فيه حاجات جديدة كثير موجودة
مش بس اغاني سيد درويش و امام و زياد

و ألف سلامة ليكي
:)

سامية جاهين يقول...

شادي وحسام وعمرو عزت: الله يبارك فيكم يا جماعة. أنا حاسة ان انا اللي حاطلع ألبوم مش هما! هيهيهي

يا شريف طب والنييييعمة الشريفة عيانة ومزكوبة وعاملة دماغ أدوية وصوتي كـأني بالعة ضفدعة! وبعدين عمرو ذنبه إيه!؟ أرجوك! أرجوك يا سعادة البيه! ده انا ماليش غيره
:p

غير معرف يقول...

حلوة الأخبار دي يا سامية...وان شاء الله علي ميعاد الحفلة يبقي "الزكاب" راح و نسمعكوا كلكوا :)

حسام يقول...

سلامتك!
على فكرة اسمها عيانة وبزكوبة ومخلصة البناديل ... كده واقعية :)

Omar Mostafa يقول...

اللــــــــــه.. ايه ده بجد هتغني معاهم؟؟ ده فعلاً خبر الموسم يا سامية، مشتاق اسمع الحقيقة.. طب باقولك ايه، ما تيجي اعمل لك عقد احتراف في جميزة وهنديكي ضعف المبلغ وعربية 128 جديدة وشقة في مساكن الظباط، ايه رأيك؟؟
:-D

M. El-Hajj يقول...

سامية تقعد جنبي في الحفلة و تقولي
"بص بص بص دلوقتي حيتحول"

عاصفة بتهب علي الناس اللي قاعدة العود في أيده يتفك بأوركسترا يا أخواننا و الله

فتحت البوست ده خمس مرات كل مرة أقراه بالكامل و أجي أعلق معرفش حقول أيه، مبروك لا يا عم قديمة لأن و الله أحنا الكسبانين لما الألبوم ده يتباع
أحنا مش حد غيرنا
كفاية أنك تمتلك الأحساس اللحظي بالتحليق اللي حازم شاهين بيمنحه لأياً كان لما يمسك عوده

كفاية أنك تحضر حفلة ليه و تسمع "دقت طبول الحرب" و لا "ألعربجية" كفاية أنك تدقق في قامته و ملامح وشه -المصرية جداً- و تشوف فيها حاجة أنت مفتقدها في الزمن اللي كل حاجة حلوة فيه بتجيب ضرفها ده

أنا مش حقوله مبروك أنا حبارك لنفسي أولي

كلمه يقول...

mbrook bgd ya gma3a el25bar el7elwa de ... rbna yekmelha be5eer isa .... btw ... ana mo3gab kebeer 2wy be eskendrella w 2keed isa hkoon fel 7afla :D

mbrook 3l album le 7azem wel regala elly m3ah w mbrook mo2daman 3l 7afla isa :D

سامية جاهين يقول...

يا عم عمر دا انتوا معاكوا ناس عتاولة في الجميزة! أنا يادوبك لسه باخطي العتبة واغني جماعي واقعد قريب من الباب (لزوم الجري يعني عشان لو الكراسي ابتدت تتحدف!)
:D
ع العموم يا سيدي تعالى واسمع بنفسك وبعد كده لو رسيت على عجلة من غير بدالات.. يبقى رضا من عند الرحمن! هيهيهي

حسام ونيرو: الله يسلبكوا :) إدعولي والنبي!

الله عليك يا زنجي! حازم حيفرج قوي لما اقول له اللي انت قلته

كلمه: تنوّر وتآنس

alzaher يقول...

عزيزت يسامية انا هاكون حاضر باذن الله تعالى وهاحاول أجيب معايا مجموعة من أصحابي
بس ممكن أطلب منك طلب ؟ لما يبقى فيه أمسية تانية لفرقة الشارع عاملها عمو أمبن مثلا ممكن تبقوا تضموني عليكم ، على اعتبار ان العبد لله يعني بيفهم في موضوع التمثيل ده شوية :)
للاسف العرض بتاعي اتأحل لشهر 11 ان شاء الله لما أعرف كام 11 بالظبط هاقولك
:)

Unknown يقول...

أنا بقة رحت امبارح يا جدعان
ف حفلة الساقية
دخلت وقعدت وكان معايا ف نفس الصف عمرو وقاعدة على رجله بنوتة صغيرة حافظة كل الأغاني ، قلت دي اكيد بنت سامية ما هو ابن الوز عوام
وف الصف اللي ورايا كان محمود حميدة ابو آية
المهم طلع امين حداد ينبه على قفل الموبيلات الراجل ده ليه طلة كده لما بشوفها بفرح وبحب كلامه حتى لو بيقول الرجاء قفل الموبيلات
بعدها طلعتوا انتوا بقة
اسكندريللا
ايه الجمال ده .... مساء السلطنة والتجلي ..... كانت اختيارتكوا للأغاني حلوة قويييييييييي
وخاصة لما قررتوا تغنوا كمان لزياد
والغنوة بتاعة اه يا دراعي يانا
انا اول مرة اسمعها ياترى هي جديدة؟؟
هي تحفة على اي حال
وسامية وآية بجد الأداء كان جميل قوي
خاصة في غنوة ده بأف مين ، وغنوة طلعت يا محلا نورها
ومحسيناش خااااالص يا سمسم انك مزكمة
بالعكس كنتي هايلة وعديتي الجمهور فعلا بس بحالة الحب والانتشاء اللى كنتي فيها
ربنا يخليكي لينا يارب .
اما حازم .... حازم ده .... مش ممكن
حازم يعني ..... الموضوع كبير كبير كبير
ربنا يحميه ويخليه لفنه وجمهوره ويمتعنا كمان كمان ....بجد مش عارفة اتكلم عنه ....
وأخيرا معلش طولت عليكي ......
سلامي لكل الناس ومبروك ع البوم مزيكا بس .
صحيح نسيت اقول حاجة مهمة كان معايا حد اول مرة يسمعكوا وبعد ما خرجنا استنيت رأيه لقيته بيضحك وقاللي انا اتكيفت .. ربنا يخليكوا بيضتوا وشي
لانى كان بقالي اسبوع دوشاه بيكوا وبقنعه يجي الحفلة

عمرو عزت يقول...

حسب التقويم المحلي لحديقة الأزهر

يوم 18 أكتوبر هايكون يوم أربعاء مش سبت

:)

islam yusuf يقول...

تجربه جميله

arabesque يقول...

أنا كمان رحت الحفلة و انبسطت جدا..من مدة مانبسطش كده
دي الحفلة الأولى اللي أحضرها لاسكندريلا كاملة، إنما شفتهم قبل كده في نقابة الصحفيين في حفل تأبين الشيخ إمام
الأداء هايل و الأغاني اللي اختاروها و تفاعل الجمهور..بجد كانت ليلة تحفة ولفتت نظري أكتر لدور الفن الثوري لما يكون جميل و بيلمس مشاكل الناس وأوجاعها..زي أغنية زياد رحباني أنا مش كافر
أداء البنات هايل وإضافة مهمة أكيد وأغنية "بأف مين ده" كانت جميلة وأدائك مميز جدا
حتى الصورة الجمالية - أعضاء الفريق لابسين أبيض و البنات أسود ومتوزعين في النص- و تناغم الأداء الجسدي و التمايل الهادي لسامية وآية كان مضبوط جدا و خلى الصورة حلوة أوي

مبروك وبالتوفيق دايما

غير معرف يقول...

جئت إلى الحفلة حاملا الكثير من التوقعات الإيجابية
ما أسعدني أنها تحققت بزيادة
استمتعت بدرجة لم أتوقعها حقا ، لم أشعر أن حازم يعزف على العود و إنما كأن العود جزء من جسده ، من روحه ، تنساب مشاعره فوق الأوتار فتخرج ياللعجب موسيقى

سامية ، لا أعرف كيف أصف ادائك سوى أنك كنت تغنين بكل ذرة في كيانك ، فملامح وجهك تتشكل مع الكلمات و يداك ترسمان الألحان في الفضاء ، و جسدك كله ينطق بالحروف ببلاغة يحسد عليها

آية حميدة ، عندما رأيتك أدركت أنه في بعض الأحيان يمكن لأحد أن يغني بداخلنا مباشرة
أشعر كأنك تغلغلت داخل روحي ، و بدأت انشادك هناك
بلا انقطاع

كنتم رائعين
كلكم بل استثناء
أتمنى ذات المتعة ثانية في أقرب وقت

سامية جاهين يقول...

يا جيرونيمو.. مش عارفة اقول لك إيه والله. فرحت جدا جدا بكلامك وفرحت أكتر لما شفتك إنت وأحمد امبارح في أمسية أحمد حداد. ويا ستي الموهبة العبقرية اللي كانت قاعدة على حجر عمرو دي مش بنتنا. أو يعني مش بيولوجيا ع الأقل :))) دي تبقى بنت بنت عمتي وأقل حاجة عندها موضوع الغنا ده.. دي بتكتب شعر موزون ومقفى! أي والله! قريب ان شاء الله تشوفيها معانا في أمسية (لما نعرف نقنعها انها تلقي شعر حد تاني غير شعرها! هاهاها)

أما أغنية "سايس حصانك" (يا دراعي يانا) دي أغنية بتاعة الشيخ إمام ومن تأليف الشاعر نجيب شهاب الدين، واسكندريللا كانوا أول مرة يلعبوها في الحفلة دي

عمرو عزت: أيوة صح عنك حق. حصلحها
:)

أرابيسك: أنا سعيدة جدا انك علقت على موضوع اللبس ده! أصل احنا في الأول كنا محتارين نعمل إيه (البنات). شادي في الأول كان عايزنا كلنا نلبس أبيض أو فواتح يعني بس بعد كده أقنعناه انه حيبقى أجمل لو احنا لبسنا لون مختلف. وسعيدة برضه انك أخذت بالك من تناغم الأداء.. المضحك إنه كان بيحصل بالصدفة البحتة لما بدأنا البروفات معاهم أنا وآية وبعد شوية بدأنا ناخد من بعض ونحس بأداء بعض.. ونحاول بقدر الإمكان اننا ناخد *الحالة* من حازم ومن العزف ونكون جزء منهم. والحمد لله واضح ااننا عرفنا نعمل كده. شكرا على ملاحظاتك الرقيقة
:)

بلو ماجنيفاير: الحمد لله اننا ما خيبناش ظنك
:). السر بسيط جدا.. ربنا يمسيه بالخير اللي علمني -في إلقاء الشعر- اننا عشان نطلع كويسين لازم "نحب الكلام اللي بنقوله و ما نِركبش الشعر" يعني ما نحاولش نظهر نفسنا على حساب الكلام..المهم الكلام يوصل. فانا لقيت ان القاعدة دي تنطبق على كل حاجة، مش إلقاء الشعر بس. وربنا يمسيه بالخير برضه اللي علمني (وكان مثال على ذلك) ان الواحد لما يعمل حاجة لازم يحط روحه فيها ويبذل أقصى جهده عشان يطلعها في أحسن صورة ممكنة.
شكرا على تعليقك الجميل ونشوفك الحفلة الجاية ان شاء الله
:))

غير معرف يقول...

سـاميه ... مش عارفه أقولك إيه غير إعجابى الشديد بيكى
بجد أنا بقالى أربع ساعات بقرأ مدوناتك أنت بس
ده أنتى أنك دماغ عاليه أوى :)
بس شكرا جدا جدا جدا على معلومات (مزيكا بس )

غير معرف يقول...

أنا أول مرة أعلق هنا .. بس بجد أنا عاوزة أقولك ان صوتك جميل و مليان روح و الله .. أنا سمعتك فى البوست بتاع حدوتة و عجبتينى أوى .. أنا متأكدة إنك هاتغنى كويس ;)

good luck

غير معرف يقول...

ألف مبروك

littilemo يقول...

صوتك عند حدوته مالوش حل

غير معرف يقول...

خسارتي ! اني لم اكن هناك...

سامية جاهين يقول...

نوران: أربع ساعات؟؟ الله يكون في عونك
:))
ألف شكر يا ستي.. نشوفك في الحفلة ان شاء الله

شريف: حتى زنجي! ده انت ما عندكش قلب بقى
:p

فنجان قهوة وليتيلمو وميريت: نشكركم على حسن استماعكم! هيهيهي
:)
نورتوني

المتشائل: اللهههه! إسمك على إسم رواية إيميل حبيبي. أنا باحب الرواية دي قوي
:)
يا سيدي ولا تزعل. الجايات أكتر ان شاء الله وبعدين لسه فيه حفلة حازم شاهين وفرقة *مزيكا بس* النهارده في مسرح الجنينة

حـدوتـة يقول...

أنا ذهبت تماماً...باسمع السي دي من امبارح بليل بعد الحفلة لحد دلوقتي...مش قادرة أبطلهم

غير معرف يقول...

للاسف فاتتنى الحفلة ومعرفتش اجيب السى دى ممكن يا جماعة حد يدلنى الاقيها فين ؟

غير معرف يقول...

الحفلة كانت رااائعة والسي دي رااااائع. إن كان حازم ولا مايلز ولا الإيقاع ولا البيانو..كلهم أحلا من بعضيهم! بس أنا كمان صحابي بيسألوا نشتري السي دي منين؟؟؟؟

ياسمين حميد يقول...

مبروك

شوقتيني لسماع السي دي، لكنني لا أعيش في مصر
كيف يمكنني الحصول عليه؟

غير معرف يقول...

اللي عاوز يسمع فرقة مزيكا بس
عمرو عزت حط علي مدونته مقطوعة جميلة من السي دي بتاعهم
http://mabadali.blogspot.com/

غير معرف يقول...

20 يوم ولسة محدش عبرنا ياااااا خلق نجيب السيديهاية منين

سامية جاهين يقول...

معلش يا عزة العيد فرحة بقى! :))
السي دي موجود في فيرجين ستورز(سيتي ستارز) وبيقولوا كمان مكتبة ديوان

غير معرف يقول...

متشكرة جدا استاذة سامية
وكل سنة وانتى طيبة