يوم الجمعة 6 أكتوبر فيه أمسية "شعر وغنا" حتقدمها فرقتي الشارع واسكندريللا من أعمال فؤاد حداد وصلاح جاهين وسيد درويش، والأمسية من إعداد أمين حداد. فرقة الشارع دي اللي هي احنا برضه بس فيه حد عبقري إدالنا إسم بدل ما احنا ما نتسماش كده :)
المرة دي حيقوم بالإلقاء من أعضاء "الفرقة" أمين حداد وآية حميدة وعمرو عبد العليم وانا، واسكندريللا حيقدموا بعض أغاني لسيد درويش أول مرة يعزفوها.
الأمسية حتكون في المجلس الثقافي البريطاني بالعجوزة الساعة 9 مساءً
المرة دي حيقوم بالإلقاء من أعضاء "الفرقة" أمين حداد وآية حميدة وعمرو عبد العليم وانا، واسكندريللا حيقدموا بعض أغاني لسيد درويش أول مرة يعزفوها.
الأمسية حتكون في المجلس الثقافي البريطاني بالعجوزة الساعة 9 مساءً
هناك ٤٥ تعليقًا:
وأنا حاضر من بدرى إن شاء الله
:)
أحجزلي جنبك يااااااض
:D
فيه شروط معينه للحفل والعنوان اه با لتفصيل
تهانينا بمولد فرقة الشارع بتراثهاالعظيم ومواهبها
الشـــابة وربنا يحعله عامر وكل سنة وانتم طيبين
بنحجز تذاكر من قبلها يا ساميه؟؟
تفاصيييييييييل
الدعوة عامة يا دنانير.. مافيش تذاكر. وعنوان المجلس البريطاني 192 شارع النيل - العجوزة. الناصية اللي بعد مسرح البلون على طول. والعرض الساعة التاسعة مساء
يا سهروردي ما تحجزش لزنجي جنبك لحسن يوقع عليك الكنافة!!! هاهاها
أنونيموس: شكراً يا فندم..ويارب نفضل عند حسن ظنكم.
:)
مبروووك :)
حاضر إن شاء الله
يارتنى كنت فى مصر انا بحب اعمال الناس دى اووى على العموم انتى تسدى عقبال ماجى
علم يا فندم .. و حاضررررر انشاء الله جداً
دعوه كريمه من شخص كريم
بإذن الله ساكون من الحاضرين
سامية ليه مافيش ويبسايت لصلاح جاهين لحد دلوقتى؟
وكنوع من رد الجميل يا سامية
أدعوك امتي وعمرو والجميع الى عرض مسرحي يشارك فيه العبد لله بعنوان "نظرة ومدد" العرض هيتم في شارع البورصة في وسط البلد يوم 21 رمضان باذن الله
more details soon :)
ياسر : جداً ؟؟؟
:D
سامية : الكنافة كانت ناشفة، دي كانت عايزة منشار كهربائي مش شوكة
ما فيش احسن من ابو بلاش
بالتوفيـــــق
I will come to see your voice
Mr. Incredible
طيب ممكن حد يرفع الحفلة على النت علشان اللي ما يقدرش يروحها لايف ؟
حسام: الله يبارك فيك
:)
عمر: ماعلش الجايات أكتر ان شاء الله
يااااااسر :))) واحشنا والله. كويس ان احنا حنشوفك.. حمدي كمان جاي ان شاء الله. بس انا باقول لك من دلوقتي اهه عشان ما تتوقعش حاجة زي عرض الهناجر. المرة دي الموضوع مش "ممسرح" يعني أبسط من المرة اللي فاتت.. ويمكن ده يكون أحسن، مش عارفة. ع العموم أدينا بنجرب! :)
شريو: أهلا وسهلا :)
أنونيموس: والله فيه موقع لصلاح جاهين وموقع لفؤاد حداد، بس لسه تحت الإنشاء واللي بينشئهم -الكلام ليك يا جااار- مشغول شوية
عمرو: ربنا يسهل لو الظروف سمحت حنيجي ان شاء الله
زنجي: إستنى عليا لما اشوفك! ما اخوك كان بياكلها وهو مبسوط وما وقعش على نفسه ولا سنتوفة! إنت اللي مستقصدني!
:-D
شادي: شكراً.. أنا باقول كده برضه!
أكتب بالرصاص: للأسف مش عارفة اذا كانت حتتسجل ولا لأ وإذا كان حينفع تتحط كلها ع النت. واقول لك الصراحة: الأمسيات دي ما بتبقاش حلوة وهي مصورة. حلاوتها انك تبقى وسط الجمهور... بس اوعدك لو نفع تتسجل عدل ويتحط منها حاجة ع النت حنحاول نعمل كده
منوَّريني كلكم ويا رب نبقى عند حسن ظنكم
وربنا يستر! :)
يا سامية
أوووعى تزعلى من اللى مش هيكون له حظ
ويحضر الأمسية
لكن أكيد هنتظر منك ملخص اللي حصل
وانطباع الناس بيكم
وليد
تمنيت لو كنت في مصر المحروسة لحضور هذه الامسية
fuzzy
ووليد:
ولا يهمكم، الغايب مسيره يعود وان شاء الله الجايات أكتر
كنت لسه بسأل عمرو في إيميل على ميعاد الحفلة ! :)
جاي بعون الله
إحجزلي جنبك مكان يا زنجي
أنا لسه راجع من الأمسية وبجد سعيد. أمتعتونا ... أداء سامية وعمرو وآية ومعاهم اسكندريللا حازم شاهين فعلا شيء جميل. أول مره أسمع القصايد دي بالروح دي والأداء ده :)
عاوزين تاني
وانا كمان لسه راجع دلوقتى.. كنتم هايلين. فكرة مشاركتكم فى تقديم أغانى سيد درويش فكرة هايلة. عمرى ما شفت كورال بيؤدى بالحساسية دى والصدق ده. فعلا أصواتكم, مع عزف حازم شاهين الحميل, حاجة تليق بسيد درويش وفؤاد حداد وصلاح جاهين الف رحمة ونور عليهم وعلى كل عباقرة بلدنا اللى انتم حسستونا الليله دى ان قلبها ,بعد كل المحن وف وسط كل العواصف ,لسه سليم رغم الأعادى ورغم المحن ورغم ضجيج الزيف والانهزامية والتشويه
أقول معاكم: بلادي بلادي
وأقول معاكم: قوم يا مصري
شكرا لكم وربنا يبارك فيكم
سامية وعمرو والشارع...النهارده بجد أنا اتمزجت واتسلطنت كمان :)) دي من أحلى وأظبط الأمسيات اللي حضرتهالكم...يمكن اللي كانت زيها الأمسية بتاعت المسرح الصغير من سنتين كده ولاحاجة (بتاعة: ارقص يا ابني ارقص) لكن النهارده كلكم كنتم عاليين جداً :)))
خسارة إنها تتعرض يوم واحد بس...حازم شاهين قاللي إنكم هتعملوها في إسكندرية تاني...صحيح؟
الأمسية كانت اكتر من تحفة بشويتين تلاتة...و كمان الصوت كان و اضح فاستمتعنا قوي...حاولوا تكرروها يا سامية
الموهوبه والمتألقه / ساميه
بجد انتى النهارده امتعتينا انتى وباقى الفريق فى هذه الامسيه الجميله
وقد كان اختياركم موفق فى المزج بين اعمال جاهين وحداد والشيخ سيددرويش
وقد كان جو مناسب جدا لرمضان
اثرت فى كثيرا مرثيه يوسف حلمى فعندما
نفتقد من نحبهم لا يكاد عقلنا يستوعب ذلك ونشعر فى كل لحظه انه موجود حولنا فى اى تفصيله من تفاصيل الحياه هنا كنا نضحك هنا كنا ناكل ،نمشى ,نلعب النرد, نحتسى فنجان من القهوه, نتظاهر،نناضل ضد القهر،نسجن فى زنزانه واحده،تفاصيل كثيره نعجز عن نسيانها بسهوله
بالمناسبه بما ان فرقتكم اسمها الشارع ليه ما بتفكروش تقدموا الاعمال دى فى الشارع داخل الاحياء الشعبيه لجمهور الناس الغلابه والشقيانين اللى هما الابطال الحقيقين للاعمال الشعريه لجاهين وحداد مش بس تكتفوا بعرضها وسط طبقه المثقفين بجد لو جربتوا ها تكون تجربه مختلفه خالص بالمره
يعنى مثلا احنا فى منطقه الوايلى من سنين طويله واحنا بنحاول نستغل اى مناسبه للترفيه عن اهالى الحى ونخليهم يتذوقوا الشعر والغناء الاصيل فقد كنامن قلب الحاره المصريه وسط الطبقه الكادحه،نستضيف فى هذه الامسيات المرحوم الشيخ امام وكذلك عزه بلبع ومحمد عزت وفاروق الشرنوبى واحمد اسماعيل وعلى اسماعيل وحاتم عزت وفرقه العوده والشاعر جمال بخيت والشاعر عبد الرحمن سيد الاهل والشاعر محمود الشاذلى و فرقه الطنبوره البورسعيديه وممكن تسألى امين حداد اللى كان ضيف احدى هذه الامسيات شوفيه استمتع مع الجمهور والا لأ
بجد كان هناك دائما تفاعل غير طبيعى بين هؤلاء الفنانين وبين الناس العاديه يعنى الشارع هو بيتنا وغنوتنا
ودلوقت بنحاول اننا نعمل امسيه لفرقه الطنبوره لكن لم يحدد ميعادها بعد لانشغال الفرقه ببرنامج وزاره الثقافه وبعض الحفلات المتفق عليها منذ فتره واحتمال تكون فى الاسبوع الاخير من رمضان
ياريت تفكرى كويس ومستعدين نستضيفكم عندنا يا ستى والافطار والسحور علينا
ولو منفعشى السنه دى هنستناكى السنه الجايه ولو منفعش عندنا ياريت نشوفكم فى اى حته فى الشارع ذلك الفضاء الرحب
:)
ملحوظه:-
يرجى قراءه هذا البوست
http://shrioo.jeeran.com/archive/2006/6/57564.html
كنت عايز رأيك فى قصايدى يا ساميه ممكن؟
انا بصراحة مدون مليش قوى فى السياسة.. ماشى جنب الحيط وكافى خيرى شرى زى الاغلبية الصامتة اللى بيقولو عليها. حضرت امسيتكم بالصدفة البحته .. بس الشهادة لله الفن كان عالى أوى دهب بندقى عيار اربعه وعشرين زي ما بيقولوا فى الأفلام القديمة. ممكن يااسيادنا تحطولنا بعض التسجيلات من امسيتكم الجميلة وكتر خيركم؟
بجد صوتك كان حلوة اوى فى الحدوته اللى كانت عند رحاب
حسام ونيرو والأنونيموس اللي بيغني بلادي بلادي بحس هادي ونادي وسندسي ومسموع: نورتوا الأمسية وانا سعيدة بجد ان احنا كنا عند حسن ظنكم. تعبك ما جاش ع الفاضي يا أمين يا حداد يا أستاذنا :) خليك كده ورانا "تعلمنا وتكلمنا وترعانا" واحنا حنوريلك أحلى شغل! الناس اهم عايزين تاني
يا رحوبة للأسف أمسية اسكندرية -اللي تبع المجلس البريطاني- اتلغت بس حازم حيشوف لو كانوا الجزويت عايزين ممكن نروح نعملها في الجزويت. والله وحشنتني جدا اسكندرية وجمهور اسكندرية! من أحلى الأمسيات اللي عملناها كانت أمسية في الجزويت من حوالي خمس سنين.
shrioo:
أسعدني جدا كلامك وتشجيعك والدعوة الجميلة. أنا الحقيقة لسه ما شفتش أمين عشان أسأله بس انا ما عنديش شك ان احنا لو عندنا فرصة نعرض للجمهور ده، يكون شرف لينا. طبعا لازم أسأل باقي أعضاء الفرقة ونحاول ننسق موعد يناسب الجميع. أرجو إنك تراسلني على عنواني البريدي- موجود في البروفيل- علشان أعرف منك مزيد من التفاصيل وننسق مع بعض. نورت المدونة
أجدع واحد: شكرا يا فندم
الأنونيموس اللي ماشي جنب الحيط: تلاقيك ليك في السياسة وكل حاجة بس انت مش واخد بالك :) أصل اللي يستمتع بكلام بديع خيري وبيرم التونسي وفؤاد حداد وصلاح جاهين لازم يكون ليه في السياسة.. ولو مالهوش، بكره يبقى له! حنحاول لو طلع التسجيل كويس نحط جزء منها ع البلوج
يا محمود يا عزت: أنا مش عارفة انت عرفت تحضر ولا لأ، بس حتى لو كنت ما عرفتش تيجي أنا مسامحاك بعد القصيدة الأخيرة اللي انت كتبتها دي! رائعة الجمال..عقبال يا رب كده ما نعمل أمسية من أشعارك
كنت هناك.. و سلمت عليكي بعد الحفله و على عمرو .. بس اكيد ماخدتوش بالكم
..
الحفله عجبتني قوي ..حقيقي .. حازم شهين فوق الرائع .. و اختيار القصايد و الاغاني كان موفق جدا
..
مش عارف معلقه معايا و انتي بتقولي
very good
في اخر اغنية الشيخ قفاعه
:-))
عايزين تاني بقى
انا كمان حضرت ..
كانت ليلة كلها سلطنة .. حقيقي متعة
الجو كان غير عادي .. ليلة صيفية مصرية بجد
اختيار القصائد كان هايل
حازم شاهين خارج من كتاب قديم جميل
المزج بين الاسماء والاصوات وناس حابة بجد اللي بتقوله .. مش قادرة اقولك غير الله ينور عليكي يا سامية بجد .. ومتشكرة جدا ليكي اولا لاني عرفت الحفلة عن طريق المدونة
ولاني سمعتك وسمعت المجموعة الجميلة ..
بقالي زمن ما استمتعش بليلة فن مصري قوي كده
تحياتي
بي إس (مالهاش علاقة بالموضوع): وشك طلته حلوة قوي .. عينك فيها لمعة عيلة جاهين تفتقدها ..
تحياتي مرة تانية
اختي الحبيبة جدا سامية بجد حرام عليكم اللي عملتوه فينا ده وانا خارج في ولد شيك عمل معاية انتريفيو بس مش عارف هو تبع ايه ولما سئلني عن راي قلت له بص في عيوني لسه اثار البكاء موجودة انتم فجرتم فينا شلالات احاسيس محتاجاها مننا مصر اوي وخلتونا نحس اننا مقصرين في حق بلدنا قوي قوي وبجد كنتم كلكم على بعضكم مزيج رائع من التالق والانفراد في ذات الوقت وبجد بجد وانا باسمع حازم حسيت ودي مش اول مرة ان انا باسمع الله يرحمه الشيخ امام ولا امين ولا انت وأية احساسكم بالنغم مش ممكن وطبعا انتم ما شفتوش نفسكم وانتم منفعلين مع الموسيقى وازاي انتم بتتمايلوا طربا وانتشاءً من انغام الفرقة المرعبة دي بجد كلكم روعه وطبعا عمرو مش ها قول غير انه باشا الالقاء ربنا يخليكوا انتم بجد اديتوني شحنة كنت محتاجة جدا زمنتظرين حفلاتكم الجديدة وان شاء الله انا مع حازم في حفلة مسرح الجنينة وتحياتي كمان مرة واحلى سلام لكم جميعا
يا أخت بلوستون. زعلانة ليه من عيلة جاهين حد داسلك على طرف؟ لا حول ولا قوة إلا بالله!
أمينة جاهين
bluestone:
أرجو إني أكون فهمت غلط وانك يكون كان قصدك حاجة تانية لما قلتي "عينك فيها لمعة عيلة جاهين تفتقدها .."
أكيد كان قصدك تقولي حاجة تانية. أصل مش معقول تكوني معتبرة ان جملة زي دي تعتبر مدح أو حتسعدني مثلا. ومش معقول برضه تكوني شفتي عيلة جاهين كلهم عشان تحكمي عليهم انهم عينيهم مطفية كلهم عن بكرة أبيهم! ومش معقول أبدا تكوني مثلا شايفة ان صلاح جاهين *عينيه مطفية* .. أكيد كان قصدك حاجة تانية
هيثم: بقى سلمنا عليك واحنا مش عارفين؟؟ طب مش تقول أي حاجة طيب! ع العموم نورتنا وسعداء انك استمتعت.. وأدينا بنحاول نرتب للأمسية في اسكندرية أهه. ربنا يسهل
:)
ولكل من وقع في غرام عزف حازم شاهين فيه خبر كويس ح اقول لكم عليه في البوست الجاية ان شاء الله
مزاجنجي:
أهلا وسهلا بيك وشكرا ع الكلام الجميل
أعتقد ان بلو ستون تقصد تقول لمعة عينين عيلة جاهين التى نفتقدها - بالنون ومش بالتاء- كل كلمة فى تعليقها بتقول كده. متهيأ لى ان أمينة جاهين تسرعت فى الاستنتاج والاتهام. وبعدين هو فيه حد يقدر ينسى لمعة الذكاء والشقاوة والحنان الكبير فى عينين عمنا صلاح جاهين؟ كلنا نفتقد هذه اللمعة الجميلة. واعتقد ان بلوستون كان سعيدة لما قابلتها فى عينين سامية. مش عارف متهيألى ان عينين صلاح جاهين كانت اوسع .. بس عينين سامية فيها نفس الذكاء والشقاوة والحنان
انونيموس: أنا فعلا اتمنى يكون عندك حق لإني فرحت جدا بتعليق بلو ستون الرقيق لغاية ما وصلت للجملة دي وما بقيتش فاهمة
أنا أسف بجد يا سامية إني مقدرتش أحضر الحفلة
كنت مجهز كل حاجة خلاص بس للأسف السنة دي عندي إمتحان كل 3 أسابيع و لحد أخر أسبوع بنعرف ميعاد الإمتحان فجأة على حسب ما يقرر الدكاترة و يجيلهم مزاج يعملوا الإمتحان :)
إدعيلي و إن شاء الله لازم حكون موجود في الحفلات الجاية
مبسوط بجد بكل الأخبار الحلوة عن إسكندريلا و مسار
يارب دايما
:)
أرجو إني أكون فهمت غلط وانك يكون كان قصدك حاجة تانية لما قلتي "عينك فيها لمعة عيلة جاهين تفتقدها .."
أيوة يا ستي انتي فهمتي غلط خااالص .. يمكن انا كمان اخترت تعبير مش دقيق .. كنت اقصد لمعة الفرحة .. من مدة طويلة جدا قابلت الرائع بهاء جاهين في ندوة في الجامعة ولاحظت انه شخصية حزينة جدا وعينيه كلها شجن حتى لما بيضحك او لما كان حد من الطلبة بيقول حاجة مضحكة .. وساعتها وبعد الندوة سألته ايه سر الحزن الغريب ده لاني لاحظته في عمنا صلاح جاهين برضه من التسجيلات والبرامج اللي كنت بسمعها وبشوفها ومن الحاجات اللي قريتها عنه وكانوا بيقولوا ان النكسة هي اللي اصابته باكتئاب وخليته دايما حزين لكن لما شفت استاذ بهاء استغربت جدا .. ولما سألته رد علي وقاللي "الحزن ده حاجة وراثية في العيلة كلنا مولودين بيه".
ولما حضرت الحفلة وشفتك شفت في عنيكي لمعة الفرحة دي وكان شكلها مختلف ..
بس ....دي سر التعليق المثير للجدل .. مكانش ليه علاقة بالحفلة زي ما قلت لكن فكرة الشجن وتعليق بهاء جاهين اللي قاله لي هو اللي فكرني
عزيزتي بلو ستون:
أنا فعلا فهمت غلط وبرضه قصدك ما كانش واضح في الأول. ع العموم يا ستي حصل خير، وأشكرك على التوضيح :)
أنا بس عايزة اوضحلك وجهة نظري الشخصية في موضوع حزن صلاح جاهين ده بما إنه أُثير: هو فيه اتجاه عام كده لتصوير صلاح جاهين على إنه الشخص المكتئب الحزين الذي هزمته النكسة وأنهت حياته الفنية والأدبية. في رأيي الشخصي ده كلام مالهوش أي أساس من الصحة لإن صلاح جاهين فضل لغاية آخر لحظة في حياته بيبدع وبيكتب الأغاني والأفلام والمسرحيات وبيرسم الكاريكاتير. ما ينفعش إنسان يبدع وهو طول الوقت حزين ومتشائم.. ولا انت إيه رأيك؟
طبعا هذا لا ينفي إن النكسة زي ما أثرت في أي مصري بيحب بلده، أثرت في صلاح جاهين ووجعت قلبه. ولإن هو أصلا إنسان حساس فهو عرضة للحزن يمكن أكثر من غيره. وزي بقيت الناس كان عنده لحظات فرح وأمل وسعادة ولحظات تانية حزن وتشاؤم. لكن أؤكدلك ان صلاح جاهين ماكانش حزين أو منطفئ بشكل عام.. أنا عن نفسي أكتر حاجة فاكراها عنه صوت ضحكته
:))
سامية سلميلى على الاستاذ امين والمايسترو حازم ورحاب وكل واحد شايل فى قلبه حب للبلد دى مصر وسليميلى على كل واحد عايش فيها وجواه احلام وافكار عشانها ونفسه الاحلام دى تبقة حقيقة بس متكتف ومش قادر سلميلى على كل واحد فيها بيحلم بمستقبلها قبا مستقبله بيتمنالها قبل ما يتمنى لنفسه عايش مستنى يشوف اليوم اللى تنزال فيه الغمامة من على عيوننا ونعرف احنا مين بالظبط سلميلى على كل واحد عايش فى مصر لكن احيانا يحس انه عايش فى غربه حتى بين اهلخ واصحابه وجيرانه سلميلى على مصر كلها يا سامية سلميلى على كل واحد بيحب فؤاد حداد وصلاح جاهين وصلاح عبد الصبور وامل دنقل ونجيب سرور والشيخ امام وعم نجم ومحمود درويش
وزى ما قولتلك قبل كدة لو فى جديد عندكو يا ريت تقوليلى سواء كان بث مرئى او مسموع او حفلة (لانى احيانا بنشغل ويدوب بفتح الاميل ومابقدرش ادخل على الموقع بتاعكو باستمرار ولكى شكرى وتقديرى)وادى الاميلات بتاعتىh_said2008@yahoo.com
hany_4hany@yahoo.com
مع تمنياتى بالتوفيق والنجاح والاستمرارية اخوكم (((هانى سعيد)))
إرسال تعليق