27 ديسمبر 2006

كل سنة وانت عايش

أنا بريشة بابا!
بابا يا بابا
يا أكتر واحد
صاحبي في الدنيا دي
صاحبي وبرضه سيادة الوالد
وأبوس الأيادي
وكلامك ده حلقة في ودني
مين يقدر عنه يحودني؟
ياللي انت مزاجك تسعدني
لك حبي وفؤادي

ضحكتك العالية الحبوبة
يا حبيبي يا بابا
دابوا في دباديبها بنات جيلك
واتجنوا صبابا
ضحكة لو انا باتمشى في غابة
وأفكر فيها
يتشجع قلبي ولا يهمه
جن ولا ديابة
بس انت تكون راضي عليّا
ما في أسانسير يعطل بيّا
واسلك في طبور الجمعية
والقى الأتوبيس فاضي
بابا يا بابا
يا أكتر واحد
صاحبي في الدنيا دي..

طول عمري أفتكرك وانت
راجع من شغلك
وانا باهتف لك "بابا جه! بابا جه!"
واجري واقابلك
وقتها ترمي هموم العالم
على أول كرسي
وتبان قدامي بحقيقتك
وبخفة ظلك
إنسان مليان رقة وحكمة
فايت بحياتي كمان نسمة
تديني أنا اللقمة الطعمة
وتتعشى انت زبادي
________
واحشني يا بابا. كل سنة وانت طيب.. وشكراً على الغنوة
________

* ذكرى ميلاد صلاح جاهين 25/12/1930
**الأغنية من تأليفه و ألحان كمال الطويل وغناء سعاد حسني في فيلم "المتوحشة"
تحديث: تسجيل كامل لاحتفالية صلاح جاهين بالمجلس الأعلى للثقافة تجدونه هنا في مدونة "واحدة وخلاص".

هناك 34 تعليقًا:

Omar يقول...

كل سنة وصلاح جاهين عايش ما بيننا وروحه اللي باقية فيكم

محمود عزت يقول...

جميل :)

فينكم ؟!
نشوفكم يوم الجمعة بإذن الله :)

shaimaa يقول...

تحفه الله يحمك يا جاهين عبقري علي مر الزمان

طلب غلس يا ساميه لو عندك الاغنيه دي تقدري ترفعيهالنا

الفيلم دا بالزات مبيجيش في اي حته كانه مغضوب عليه مش عارفه ايه السبب بصراحه

محمد يقول...

كل سنة وأنت طيب يا أستاذي - صلاح جاهين - وبيننا ويطول ربك في عمرك وتحية رقيقة لسامية وربنا يخليكي فاكراه على طول

السهروردى يقول...

صباح الخييييير

تديني أنا اللقمة الطعمة وتتعشى انت زبادي
والنبى ماتفكرينى
أهوه الزبادى داير علينا كلنا فى البيت بلا إستثناء
ماله الزبادى بقى ؟
:)

أنا نفسى فعلا أشوف الفيلم ده بأى شكل

كل سنه وأنتى طيبه وبتفكرينا دايما

أُكتب بالرصاص يقول...

كل سنة وانت طيبة


نشكرك على الكلمات الرقيقة دي
وانك ذكرتينا بالفنان الرقيق
ده

مش هو ده العيد بتاع الرقاق ؟

Ghada يقول...

كل سنة وهو عايش في قلوبنا وقلوبكم قبلينا :)

مش هاتتخيلي اتبسطت بالبوست ده قد إيه.. زي مااكون عطشااان وشربت
فعلا :))

سامية يقول...

شكراً يا جماعة.. تعيشوا وتفتكروا

محمود: ليك وحشة والله! نشوفك ان شاء الله يوم الجمعة. سعيدة انك حتقدر تيجي

شيماء: هي الغنوة المفروض موجودة على كاست عند حد فينا في مكان ما بس عايزة تدوير. مش عارفة اذا كنت حاعرف أنقلها ولا لأ. ع العموم أوعد حادوّر عليها واحاول ارفعهالكم

يا حسين.. أعتقد ان الفيلم موجود عند احمد حداد. تصدق أنا كمان عمري ما شفته كله على بعضه. لو لقيته حابقى أقولك ونتفرج عليه كلنا يوم.

يا غادة يا جميلة.. مااحنا في الهوا سوى بقى. مش بيقولوا اسأل مجرب؟ بالهنا والشفا يا ستي وربنا ما يعطشك أبداً :)
منوّراني

Lasto-adri *Blue* يقول...

تعيشى وتفتكرى دايما يا سامية
:)
وكل سنة وجاهين عايش

hillz يقول...
أزال أحد مشرفي المدونة هذا التعليق.
hillz يقول...

god bless his soul, ya samia

Ghada يقول...

سامية!
كنتم مذهلين إمبارح.. بجد مش معقول.. أنا مدينة ليكم بحالة الإنشكاح اللي أنا عايشاها دي.. يا بنتي مش عارفة أقفل بقي من الإبتسامة البلهاء المرسومة عليه من امبارح..

اتبسطت جدا من إني شفتك.. إيه ده!.. إنتي من "أعسل" الشخصيات اللي قابلتها في حياتي أساسا

*تفعيييييص*
:)

واحدة وخلاص يقول...

فى الاحتفالية اول امبارح اتفرست جدا من الخلايق اللى فاتحين الموبايل وعمالين يقفلوا ويفتحوا فى الباب بس كنت حاسة انك خلاص هتقومى تضربيهم
بس كانت ليلة جميلة وانتت كنت متالقة يا حتحور حتى فى الغضب
استاذ بهاء واستاذ امين حاجة متتوصفش
بس اللى بهرنى الجميل العبقرى محمد عفيفى مطر
مش متخيلة الكائن الاسطورى ده (بالنسبة لى على الاقل )يلقى شعر عاميه لعبقرى تانى عظيم
شكرا يا عم جاهين خلودك مفيهوش جدال كفاية انه الله يرحمه قادر على توليد المتعة حتى بعد رحيله الله يرحمه
على فكرة انا حطيت الامسية كلها عندى لو حد عاوز يسمعها

hesterua يقول...

كل سنة وهو عايش بينا
كل سنة وهو سبب فى طلوع ناس بيحبوا البلد دى
كل سنة وهو عايش فيكو بيكو
كان نفسى احضر والله بس ملحوقة انشاء الله...الف مبروك بجد

DoDo يقول...

سمسمة الجميلة
أول مرة أحضر حفلة اسكندريلا يوم الأرعاء اللي فات، وبجد بجد، غمرتني أصواتكو واحساسكو
أنا اللي عرّفـِتك عليّ سحر الموجي، أكيد مش هتفتكريني في وسط زحمة المعجبين،
تحية لفرقتكو الجميلة،
وكل سنة وأصواتكو صاحية وعايشة في وسطنا
هدى

Sherif Nagib يقول...

كل سنة و انتي طيبة يا سامية و كل سنة و صلاح جاهين عايش أكيد.

طبعاً أنا مش محتاج أتكلم عن الحفلة :)
الحاجة الوحيدة اني كان نفسي تغنوا "اقرأ يا شيخ قفاعة".. بس كل ماجي أعلي صوتي و اطلبها ألاقي الناس تطلب أغنية جيفارا، على فكرة أغنية جيفارا دي أنا مابحبهاش خالص .. حاسس ان القصيدة أخرها تتقري و بس لكن ماتتغناش.. لكن أكيد فيه ناس غيري شايفة كده بدليل إنهم طلبوها.

فرحت انكوا غنيتوا "ده بأف مين" بس متضايق إنها جات بناء على طلب المستمعين.. معقول دي ماتكونش في البرنامج الأساسي يا ناس !! :)

و لحن البرابرة طلع هايل ، و المقطع بتاع الأمسية كان رائع و عاوز أقول لك إني كنت حافظه من ساعة الأمسية أصلاً و كنت عمال أردده معاكم امبارح و اتنفذ بشكل جميل جداً جداً.. والدتي كانت متأثرة بيه قوي بس أختي الصغيرة ماكانتش فاهمة حاجة لأنها من الجيل الضايع اللي مابيفهمش عربي:)
عاوز أقول إني كنت مقلق من عدم وجود هاني بدير بس أستاذ أيمن صدقي كان هااااااايل !

و كل سنة و انتوا طيبين مرة ثانية.

شيماء زاهر يقول...

إزيك يا سامية..
أنت أكيد مش حتفتكريني.أنا قبلتك مرة واحدة في الساقية ، وفاكرة إن ساعتها كنت بكلمك عن البلياتشو أول مجموعة لي.
أنا ما كنتش أعرف إن لك مدونة. على العموم أنا بس عايزة أضم صوتي لصوت غادة

You r really a very nice person and keep up the good work :)
we-kol Sana wenti Tayyeba

Solo يقول...

كل سنة و انتى طيبة يا سامية
تعيشى و تفتكرى يا جميل

nour يقول...

كل سنه و احنا اللى طيبين
الله يرحمه عم صلاح جاهين متربيين على شعره

سامية يقول...

بلو وهلال وسولو ونور وأحمد وهدى: شكرا يا جماعة.. كل سنة وانتم طيبين وتعيشوا وتفتكروا
:)

شريف: والله فرحت جداً انكم اتبسطوا. وعلى فكرة انا معاك تماما في موضوع غنوة جيفارا. أنا كمان مش باحبها وكنت شايفة انها مش مناسبة في البرنامج اللي كنا عاملينه بس ما رضيناش نزعل الناس اللي طلبوها بما إننا وافقنا على حاجات قبليها. أما بالنسبة ل"بأف مين" فاحنا ما حطيناهاش عشان كنا لسة لاعبينها في الحفلة اللي فاتت وبصراحة ما كناش عارفين انها سمعت أوي كدة :). وأيمن صدقي جامد طبعاً بس انا برضه كنت حاسة باختلاف في "الجو العام" بعدم وجود هاني بدير

يا غادة يا سكرة! والله كانت أحلى مفاجئة اني قابلتك أخيراً. كل سنة وانت طيبة :))

شيماء: فاكراكي طبعاً! وحتى بالأمارة أول مرة اتقابلنا كان في حفلة الجميزة :) نورتينا يا جميلة

واحدة وخلاص: شكراً على كلامك الرقيق. هي فعلاً كانت ليلة جميلة وكنت حاسة ان بابا موجود معانا.. أنا لسه مش عارفة انزل الفايل على فكرة. لو ممكن تبعتيهولي عالميل تبقي عملتي فيا جميلة جامدة قوي. وبعد إذنك ممكن احط لينك للبوست بتاعك هنا؟

واحدة وخلاص يقول...

طبعا ممكن
ده شرف ليا وللبوست كمان
انا هبعت لك الفايل هى قصيدة طمنى يا عم جاهين بس تقريبا انا هبعتهالك ولو فى حاجة تانية معلقة قوليلى

Ibn Bint Jbeil يقول...

كل سنة و انتي طيبة والله يرحمه يا سامية.

كلام جميل جداً..

مصـ( الخير )ـعب يقول...

كل سنة وانتي طيبة،

وربنا يسامحك قلبتي علي المواجع

Dananeer يقول...

متاخره يا ساميه معلش

صلاح جاهين بسمه و دمعه فى قلوبنا كلنا معانا طول الوقت فى الاتنين


ربنا يرحمه

shady يقول...

الله يرحمه , ويرحم كل الحبايب
الجيل الحاضر الغايب

ياسمين يقول...

أنا باضحك يا جماعة مع انى راح منى .. ولاعة
صلاح جاهين الجميل
برضه من فيلم المتوحشة لسعاد حسنى
كلام لا يفارقنى دائما .. حتى فى أحلك الظروف
اضحكوا بقى با جماعة .. حتى .. لو راح منكم ..ولاعة

سامية يقول...

واحدة وخلاص: ألف شكر يا فندم. أنا حطيت اللينك بس لسه مش عارفة انزّل الفايل بتاع على إسم مصر.. ع العموم ما تشغليش بالك، مش مهم. يمكن ربنا بيحميني من تفسي عشان مااسمعش نفسي وانا باقول القصيدة فأعيّط تاني

ابن بنت جبيل: وانت طيب. كان نفسي تكون عندي الغنوة كمان عشان اسمعهالكم. رائعة الجمال بصوت سعاد حسني

دنانير: ولا متأخرة ولا حاجة. شكراً لمرورك وتعيشي وتفتكري :)

شادي: آمين

ياسمين: أهلا بيكي. الغنوة اسمها "شيكا بيكا" وكلامها فعلا جميل جداً. أنا باضحك من قلبي يا جماعة،
مع إني راح مني ولاعة،
وبطاقتي في جاكتة.. سرقوها،
وغلاسة كمان سرقوا الشماعة،
بقيت ارجف م الساقعة لكن باضحك!

Moia يقول...

كل سنه و صلاح جاهين احلى ما فى الكون
:)

غير معرف يقول...

عايش

و الله عايش

و ما حدش يقدر يقول غير كده

اتمنى الناس تبقى فى ربع انسانيته

يااااه لو ينفع

دى الدنيا تبقى حلوه قوى

ألوان و روايح تجنن و عيون بتلمع بالعنفوان

يااااه



http://crisis-poets-locaa.blogspot.com

Mone يقول...

Nice poem Samia :)

خلود - بيروت يقول...

مش بس الي يكتب كده ما يمُتش، و كمان الي يخلّف زي سمسومة ما بمُتش

amira يقول...

لالسامية
أبوكي واحش قلبي برضه
وانتي كمان وحشاني وقعدة تريانون الصبح معاكي وحشاني

......
تحياتي

حسن ارابيسك يقول...

اسكنه الله فسيح جناته
لم تحزن الأمة العربيةفقط على صلاح جاهين
ولكن كان للشعر النصيب الأكبر من الحُزن بعد رحيله
لذلك لم يكن في إستطاعتي وأنا أُنشئ مدونتي الجديدة أن تكون خاليه من تقدير ولو بسيط له وبأبيات متواضعه
من تأليف العبد الله لذلك شرف لتدوينتي أن تُشرفها سامية جاهين ريحه الحبايب

غير معرف يقول...

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

A片,AIO,AV,日本AV,色情A片,AV女優,A漫,AIO交友愛情館,線上A片,免費A片,A片下載,情色A片,微風成人,嘟嘟成人網,成人,成人影片,成人光碟,成人影城,成人交友,愛情公寓,色情聊天室,情色貼圖,色情,色情影片,做愛,情色,哈啦聊天室,聊天室,UT聊天室,豆豆聊天室,尋夢園聊天室,080視訊聊天室,080聊天室,080苗栗人聊天室,自拍,性愛

情趣用品,情趣用品,情趣,情趣,A片,A片,情色,A片,A片,情色,情趣用品,情趣用品,A片,A片,情色,情色

情色視訊,美女視訊,辣妹視訊,視訊聊天室,視訊交友網,免費視訊聊天,視訊交友90739,視訊,免費視訊,情人視訊網,視訊辣妹,影音視訊聊天室,視訊交友,視訊聊天,免費視訊聊天室,成人視訊,UT聊天室,聊天室,豆豆聊天室,色情聊天室,尋夢園聊天室,聊天室尋夢園,080聊天室,080苗栗人聊天室,上班族聊天室,小高聊天室