04 نوفمبر 2006

فؤاد حداد رايح لبنان وواخدنا معاه :)

لإني لسه مش مستوعبة... ومخضوضة جداً وسعيدة جداً وخايفة جداً، ح اسيبكم أحسن مع التفاصيل، بدال ما اقعد اقول كلام ما لهوش معنى! إدعولنا بس نبقى قد المسئولية دي، وقد اللحظة دي...

لأول مرة في لبنان:

"إزرع كل الأرض مقاومة"
أمسية شعرية غنائية من أشعار

فؤاد حدَّاد

تقدمها فرقة "الشارع"
على مسرح قصر الأونسكو ببيروت
يوم السبت 18 نوفمبر/ تشرين الثاني
الساعة 9 مساءً
وذلك ضمن فعاليات "لقاء بيروت العالمي لدعم المقاومة"

الأمسية إعداد:
أمين حداد
الأغاني من ألحان:
سيد مكاوي
حازم شاهين
محمد عزت

(الجزء الخاص بحدوتة "الشاطر حسن" اشترك في تأليفه متولي عبد اللطيف عام 1963)

فؤاد حداد شاعر مصري من أهم شعراء العربية، ولد في عام 1927 وتوفي عام 1985.
كتب حولي 30 ديواناً معظمها من شعر العامية المصرية، كما كتب بالعامية اللبنانية والفصحى. وكان أول دواوينه "أحرار وراء القضبان"، الذي نشر في عام 1952، بمثابة انطلاقة مدرسة جديدة في شعر العامية المصرية.
أشعار الأمسية تم اختيارها من أعمال لفؤاد حداد كتبها بين عامي 1963 و 1982، مواكباً الأحداث الكبرى في الوطن العربي مثل حرب 1967 و1973 والحرب الأهلية في لبنان 1975 والاجتياح الإسرائيلي للبنان 1982.

إزرع كل الأرض مقاومة
ترمي في كل الأرض جدور
إن كان ضلمة، تمد النور
وإن كان سجن، تهد السور
كون البادئ، كون البادئ
كل فروع الحق بنادق
غير الدم، ما حدش صادق
من أيام الوطن اللاجئ
إلى يوم الوطن المنصور
إزرع كل الأرض مقاومة

هناك 26 تعليقًا:

Zengy يقول...

يا ريتني كنت معاهم

:'(

amani يقول...

بتمنالكم التوفيق يا سامية
ويا ريت اشوفكم قريب عندنا

BIRA يقول...

ربنا يوفقكوا طبعا .. وإنتى عارفه يا ساميه قد ايه انا مهوسة بالأوبريت ...
واتمنى إعادته مرة أخري .. مع تمنياتي بالتوفيق دايما ...

Dananeer يقول...

ربنا معاكم يا ساميه
لسه امبارح كنت بافكر فيه
كنت ماسكه فى الموت حنعيش

سامية يقول...

يا زنجي ما تزعلش نفسك ح ابقى اسلملك على سماحة السيد :))))))
واحشنا جدا انت وحسين والله! ابقوا تعالوا اتفرجوا ع البروفات

أماني: أشكرك. أكيد لازم! تأكدي لو الفرصة جت مش حنسيبها تعدي أبداً

بيرة: خلّي بالك ده مش نفس العرض اللي انتي شفتيه. ده إعداد مختلف أول مرة يتعمل بس فيه بعض قصائد من اللي سمعتيها

دنانير: في الموت حنعيش بتاعة أمين حداد مش فؤاد حداد. الأمسية اللي حنعملها من أشعار فؤاد حداد. ولا انتي قصدك كنتي بتفكري في أمين؟ :) ع العموم هما الاتنين أجمل من بعض، ليكي حق تتلخبطي

نهاركم أبيض وشكرا على الدعوات الجميلة
:))

Omar يقول...

اوووف اوووووف :-)

حسام يقول...

ربنا يوفقكم وإن شاء الله تطلع في أحسن صورة
أنا كمان نفسي أكون هناك

ياترى في تسجيلات لاخر مرة؟

باسم شرف يقول...

برافووووووووووووو
وربنا معاكو دايما وكل اللي بتقدموه هيكون هناك فرصة للتنفيس وللتعبير

moatassem bellah يقول...

hey there , am really so happy to comment on my poste on my blog www.moatassembellah.blogspot.com , hope to keep viewing my blog , and i really love ur blog it's amazing ;)

غير معرف يقول...

تحيّة لكل من قاوم بالفكر والكلمة...من شهداء 6 أيار في دمشق و بيروت ..الذين كان اغلبهم ادباء وشعراء ومفكرون ..الى غسان كنفاني وكمال ناصر..الى مصطفى العقاد..الى الذين استشهدوا همّا وغمّا وصدورهم تنوء بوجع الوطن..صلاح جاهين..فؤاد حداد..الماغوط وممدوح عدوان...الى الباقون اينما كانوا ..وكيفما كانت اسماؤهم واشكالهم...محمد.. عيسى ..حسين..عمر.. جورج ..موسى..فاطمة..مريم
الذين صرخت بنادقهم في جنوب الكرامة ..الله اكبر..فاابيضّ وجه هذه الامة الكالح دهرا..الذين تصرخ دمائهم في شوارع غزة وبيّارات الضفة...يجب ان تصرخ وراءهم حناجر وأقلام ..عقول لاتخاف الموت حبّا بهذا الوطن
فليبقى كل شيء عاليا علوّ هذا الوجع..علوّ رؤوس السيّد ورجاله الذين اعاروا جماجمهم لله...حبّا وكرامة..وعشقا..
و ويل لأمّة..
.................
خالص تحياتي واحترامي ...الى الامام دائما

جو
http://joe75.jeeran.com/archive/2006/10/112066.html

shady يقول...

ألف مبروك يا ست الكل
جعلكم الله صوتاً للفن الحقيقى

سامية يقول...

هي أوووف بعقل يا عمر! إدعيلنا نبقى قدها!

باسم ومعتصم وجو: شكراً جزيلا.. منوّرين!
:)

حسام: للأسف مافيش تسجيل

شادي: الله يبارك فيك يا زعيم!

daktara يقول...

مممممممممم
جميل جدا كعادته دائما

Ibn Bint Jbeil يقول...

marhaba ya samia, see pictures and video of Bint Bint Jbeil

أُكتب بالرصاص يقول...

طيب مش جايين دبي !!!!

انا نفسي اشوف اي عمل من اعمال حداد

بس سؤال بسيط
انت دورك ايه يا سامية؟

سامية يقول...

أكتب بالرصاص: دبي؟ أهي دبي دي تبقى غريبة شوية.. الواحد ما يبقاش عارف جمهوره منين أصلا
:))

تعالى انت أجازة واحنا نعمل لك أمسية مخصوص.

بالنسبة لسؤالك: أنا دوري فرد من أعضاء الفرقة... هو الموضوع مش مفصل قوي.. يعني اللي بيحصل هو ان أستاذ أمين بيعمل الإعداد (اختيار الأشعار اللي حنقولها وترتيبها) ويقترح الأغاني أو الأشعار اللي ممكن تتلحن وبعدين بنقعد نقرا النص كلنا مع بعض وحازم شاهين يحط تصور موسيقي للموضوع وبعدين نقسم الأدوار ونحفظ الشعر ونقعد بقى نعمل بروفات قد ما ربنا يقدرنا.. وأثناء البروفات المسألة بتبقى عاملة شوية زي ما تكون ورشة عمل.. ممكن يطلع منها اقتراحات في الأداء أو تقسيم القصائد، الخ. برضه علشان ما أديلكش فكرة غلط، إحنا ما حدش فينا ممثل محترف.. ومش بناخد المسألة على إنها تمثيل قد ما بتكون محاولة لنقل الشعر بأداء بسيط جداً لكن بصورة واضحة ومحسوسة توصل للناس.

نوّرتني يا فندم
:))

mohammad يقول...

دي حاجه عظيمه أوي يا ساميه، ومدونتك دي جميله أوي ( شفتيني وأنا بتكلم مصري) الله معك، عوده موفقه انشاءالله
:-)

أُكتب بالرصاص يقول...

شكرا على الايضاح المستفيض ..رغم اني مافهمتش حاجة:)


لا ..فهمت

يعني بتعملو اوبوريت
صح ؟
او تفاشيح ؟!

محمد أبو الفتوح يقول...

qydمش عايز أقولك فؤاد حداد يبقى بالنسبه ليه إيه
أبويه
بجد
فؤاد حداد مش شاعر عبقرى و عظيم و مر بكل مراحل التطور الذاتى من أول أحرار وراء القضبان لحد النقش بالاسلكى و كليم الشيخه أم الآه
فؤاد حداد متجسد معايا فعلا بيورينى السكه و بيزرع جوايا كل الأخلاقيات
عندى عدد أخبار الأدب اللى بيتكلم عنه
كل ماقرا حاجه جديده عنه بكون طاير من الفرحه
و لما عرفت إن الشاطر حسن إتمسرحت و إنه كان بيحكيها على الدكه كنت مش هنا كنت معاه
أبوس إيديكم زودوا مجهوداتكم علشان شل آبا فؤاد كله يتعرض بأى شكل و إذا كان ممكن _و ياريت_ أشارك بأى مجهود علشان أرد للراجل ده جزء من فضله عليه اللى مش هاينتهى أنا تحت أمره و أمركم
تليفونى أهو 0109189140

هيثم محفوظ يقول...

فى البدايه مش قادر أوصفلك أنا حاسس بإيه و انا بكتب لبنت صلاح جاهين يمكن إحساسى ما يفرقش عن إحساسى يوم ماقابلت الأستاذ بهاء جاهين من فتره على قهوة زهرة البستان بجد إحساس ما يتوصفش
أنا هيثم محفوظ بلحن و بغنى و دى أول مره أكتبلك فيها
مش عايز أقولك فؤاد حداد بالنسبه لى مثل أعلى , لما بقعد أتأمل فى تجربته و ف مشروعه اللى بشوف فيه تطور إنسان قبل أى حاجه تانيه بكون مبهور جدا
إنسان يبان مالوش علاقه بالإحباط لكنه بالعكس بيتهيألى كان من أكثر الناس إحباطا
الجميل فيه و اللى بالنسبه لى تعتبر آيه هو تحصنه بإيمانه و مبادئه و مصريته و كل دول شكلوا جواه حقايق مهمه قوى يمكن هيا اللى ربته و هيا اللى خلته يتغلب على إحباطه و يطلعله لسانه
بجد أنا كموسيقى مثلى الأعلى فؤاد حداد ..
قبل مانسى أنا عندى حفله فى ساقية الصاوى يوم 23-12
أتمنى إنك تشرفينى

سامية يقول...

محمد: ألف شكر يا فندم :) منورني والله

أكتب بالرصاص: حاجة زي كده :))))

محمد أبو الفتوح: أشكرك يا محمد، والله أدينا بنحاول نعمل اللي نقدر عليها. الأعمال الكاملة مستمرة في النزول والأمسيات على ودنه والحمد لله. طبعاً حاحتفظ بنمرتك وياريت كمان تبعتلي الإيميل عشان ابقى اقول لك لما يكون عندنا أي نشاط من هذا النوع. شكراً لمرورك

هيثم: أهلا وسهلا بيك. أوعدك لو كان فيا نفس حنحاول نييجي الحفلة بكرة. إحنا أصلنا لسه راجعين من لبنان امبارح وبقالنا أربعة ايام ما نمناش!

محمد أبو الفتوح يقول...

الإ ميل
neoandmatrix1@yahoo.com

hamza1952 يقول...

مش هاقولكم حاجة عن عظمتكم وجمالكم وكل حاجة حلوة فيكم ، لإن ده واجبكم ودوركم وعاوز اطلب منكم طلب : عاوز اعرف خط سيركم واتابع اخباركم واسجل لكم حاجات للتاريخ وكمان عشان اخد زوجتي وبنتي ونلف وراكم ونستمتع بالدور العظيم بتاعكم

radwa يقول...

انا بصراحه لسه شايفه الفن الرائع وطريقة الاداء الرائعه اللي بتقدموها على الجزيره بجد برافو...بس انا عاوزه اعرف في تسجيلات ليكم اقدر اسمعها عالنت؟

???? ???? يقول...

هايل يا ساميه ربنا يوفقكم جميعا انا شوفتكم على الجزيره ودى كانت اول مرة اشوفكم ووالله والله صحيتو فيا حاجات انا كنت بقول عليها ماتت او مخنوقة فى الجو اللى انتو اكيد عارفينه هنا فى مصر
انا بحب فؤاد حداد وجاهين ودنقل ومحمود درويش والشيخ امام وعم نجم ونجيب سرور وصلاح عبد الصبور وكل واحد كان جواه حاجه نفسه يعملهاللبلد دى وانقهر
لما مقدرش
ياريت يا سامية بعد اذنك لما يكون فى
جديد عندكو تقوليلى
سواء حفلات او بث مرئى او مسموع انا اسمى هانى ودا الاميل بتاعى hany_4hany@yahoo.com
وعلى فكرة انا سجلت جزء من لقائكم على قناة الجزيرة وختاما اتمنى لكم النجاح الدائم والاستمرارية والله الموفق

غير معرف يقول...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人