27 يوليو 2006

في المظاهرة الناس كانت بتقول بالصريح

أنا أكيد مش خبيرة مظاهرات لكن أكيد أقدر أقول التالي:

شفت ناس من معظم التيارات المصرية موجودين وفي نفس الوقت كان فيه ناس كتير شكلهم مش منتميين لتيار معين لكن جايين عشان موافقين على شعار المظاهرة "المجد للمقاومة" وجايين يتضامنوا مع لبنان . كان واضح في الأول ان كل تيار له هتافاته اللي عايز يفرضها بس في نفس الوقت لاحظت ان معظمهم كانوا بيحاولوا يوحدوا الهتاف. كانوا بينجحوا في معظم الأوقات بس بعد حوالي ساعة الا ربع ولما الدايرة اللي الأمن كانوا عاملينها حوالينا وسعت أكثر، المجموعات انفصلت عن بعض شوية وبقت كل مجموعة بتقول هتافاتها.

الأمن طبعا كان مسخرة! وصلنا الميدان الساعة خامسة ونص (يعني قبل ميعاد المظاهرة بنص ساعة) ولقينا الميدان بكل ركن فيه ملغم برجال الأمن والمخبرين –اللي ناقص يكتبوا على صدرهم "مخبر سري"- ومجموعات صغيرة شكلهم بلطجية واقفين متأهبين على نواصي الشوارع المؤدية للميدان. أنا مش بابالغ: كل مترين بالكتير كان واقف مخبر أو رجل أمن. وكل ما نقف شوية في حتة –كنا أربع أشخاص بس في الأول- "واحد ييجي يقول لنا ممنوع الوقوف هنا يا كابتن" أو "إنتو تبع تنظيم إيه؟" أو "إنتو واقفين هنا ليه؟" طبعاً احنا حسّينا ان الموضوع شكله ما يطمنش وشكلهم كده مش حيسيبوا الناس تتجمع.

لكن الناس اتجمعت ومرة واحدة سمعنا كمال خليل بيهتف وكل الناس جريِت ناحيته وكانوا كتير. تفاوتت التقديرات، تميم وعمرو قالوا إن المظاهرة في أوجها مش ممكن تكون تعدّت ألف شخص. أنا ودكتورة رضوى عاشور كنا حاسّين انهم كانوا أكتر من كده. على العموم حتى لو كانوا وصلوا لألف فأنا أعتقد إن نظراً للظروف الأمنية الفظيعة وغياب طلاب الجامعة الأمريكية –عشان الأجازات- وغياب الإخوان المسلمين (كان فيه أفراد منهم بس ما كانش فيه مجموعة كبيرة واضحة من الإخوان ولا شفت شعاراتهم أو علمهم بكثرة)، لو نظرنا لكل الظروف دي فأكيد نقدر نعتبر المظاهرة كانت ناجحة.

رُفعت أعلام لبنان وفلسطين ومصر وطبعاً صورة حسن نصر الله مكتوب عليها "رمز المقاومة العربية"

أما عن أكثر الهتافات اللي سمعناها ورددناها فكانت:

"يا نصر الله يا حبيب، إضرب إضرب تل أبيب"

"بالروح بالدم نفديك يا لبنان"

"الله هالله هالله هالله، شد حيلك يا حزب الله" (وساعات يا نصر الله)

"يا بو هادي يا بطل، إنت بتحرر وطن"

"يا نصر الله اطلب تلاقي، في القاهرة مليون فدائي"

"بنرددها جيل ورا جيل: بنعاديكي يا إسرائيل"

"واحد... إتنين، الجيش العربي فين"

"اللي بيضرب في لبنان بكرة يضرب في أسوان"

"اللي بيضرب في بيروت بكرة يضرب في أسيوط"

"اللي بيضرب في العراق بكرة يضرب في الورّاق"

"حسني مبارك وعبد الله باعوا يا ناس حسن نصر الله"

"آدي الأبطال - يا مقاومة
على خط النار- يا مقاومة
وفي فلسطين - يا مقاومة
حماس طالعين - يا مقاومة"
(دي ليها كمالة بس طويلة فماعرفتش أحفظ منها غير الحبة دول)

"يا مبارك يا جبان يا عميل الأمريكان"

"يسقط يسقط حسني مبارك"

"علّي وعلّي وعلّي الصوت.. اللي حيهتف مش حيموت"

"علّي وعلّي وعلّي كمان.. ضدّ صهاينة وأمريكان"

"أول مطلب للجماهير.. قفل سفارة وطرد سفير"

"مقاومة مقاومة مقاومة مقاومة"

"مقاومة مقاومة مقاومة مقاومة"









هناك 18 تعليقًا:

Lasto-adri *Blue* يقول...

ياااه
شفت البرنامج التسجيلى على قناة دريم يا سامية وكنت ح تهبل
ناديت على كل اللى اعرفهم.. ويعنى مش قادرة اقول لكم كنتم منورين ازاى

ربنا يحميكم.. ويحمى كل اللى بيفكر صح بقى.. كفيانا جحور

غير معرف يقول...

مقاومة مقاومة مقاومة اتمني ان نقاوم جميعا وان تكون مقاومتنا شرسة وعنيفة وحكيمة ضد العدو ولو مرة واحدة

مهندس مصري يقول...

مقاومة مقاومة مقاومة اتمني ان نقاوم جميعا وان تكون مقاومتنا شرسة وعنيفة وحكيمة ضد العدو ولو مرة واحدة

سامية يقول...

يا لست طمنتيني والله انها جت في دريم .. أنا أصلي مستغربة جدا ان لغاية دلوقتي الجزيرة ما جابتش سيرة ولا حتى في شريط الأخبار

منوّرني يا باشمهندس

Mad Man يقول...

المقاطعة


السلام عليكم ورحمه الله

الاخوة الكرام


ادعوكم من هذا المكان وكل من يقرا هذه السطور الى :



المقاطعة المقاطعة المقاطعة المقاطعة



اخى الكريم اخى العربى اخى الانسان


اننا يتم قهرنا واذلالنا فى اوطاننا والحكومات العربية العميلة لامريكا واسرائيل تعمل على ذلك فأقل شئ مطلوب منك ان تقاطع كل ما هو امريكى او صهيونى اسرائيلى ( وقد امتلات اوطاننا بهذه المنتجات )


صن كرامتك صن عزتك صن عرضك شارك اخوانك فى فلسطين ولبنان والعراق محنتهم


و


قاطع قاطع قاطع قاطع

Kholoud-Beirut يقول...

Great Samia, I saw the scene when you describe it. I saw the excitement and the enthusiasm of the Egyptians. The Lebanese flags made it look like home, and hezbollah's flags as well. I really wish I were with you saying these great hitafat; I even said them loudly while reading them. Sorry for writing in English at such a moment, but this belgian computer doesn't read arabic. Victory, and see you all in Lebanon soon.

Alaa يقول...

كانت مظاهرة كويسة مقارنة بالفترة اللي فاتت، بس كان نفسي يبقى عندنا فرصة نمشي في الشوارع و نكلم الناس :-(

المهم أنه بعد السجالات الساخنة عن المقاومة و حزب الله حسينا أن فيه تيارات على بعضها يا أما مش هتنزل يا أما هتنزل بشعارات تفرق الناس و بعد ما عرفنا أن الأخوان مش نازلين و لو حتى بالتمثيل المشرف الواحد افتكر الموضوع هيبوظ.

بس اللي حصل أن اللي نزلوا من التيارات اللي فيها ناس اتكلمت ضد حزب الله يا أما كان موقفهم مع المقاومة لكن ضد استخدام نصر الله كرمز، او نزلوا و رفعوا رايات حزب الله، و الأخوان اللي حضروا أغلبهم حضر عصب عن عين الجماعة.

بس مشفتكيش خالص؟؟

سامية يقول...

يا خلود يا حبيبة قلبي إنت تكتب عربي انجليزي لاوندي هيروغليفي، ما يهمش! المهم انك جيتي ونوّرتيني زي ما كنتي "منوّراني" لما كنت بافتكرك وانا باهتف "بالروح بالدم نفديك يا لبنان". أشوفك إن شاء الله قريبا في بيروت الحبيبة

طبعاً يا علاء... كلنا نفسنا نمشي في الشارع ونضم الناس.. بس المظاهرات دي بالذات لا يمكن الأمن يسمح فيها إن الناس تنضم.. لإنها فعلا ممكن تلم ملايين لو اتسابت. إحنا بعد ما خرجنا طول ما احنا ماشيين شايفين ناس (معظمهم شباب) عمالين يقولوا "دي مظاهرة عشان لبنان".. "هم بيهتفوا بيقولوا إيه".. "تعالي نروح نسمع.." (وبعدين طبعا الأمن يهشّوهم)
:(
أنا كمان ما شفتكش. أنا وعمرو كنا واقفين في النص معظم الوقت ما بين المجموعة اللي كانت حوالين الولد اللي كان بيهتف الهتاف الطويل بتاع "يا مقاومة" والمجموعة اللي حوالين كمال خليل

بصراحة أنا شفت حوالّي ناس كتير طول عمرهم موتهم وسمهم أي حاجة ليها علاقة بالدين وأي حاجة ليها "صبغة إسلامية" لكنهم كانوا واقفين بيهتفوا الله وأكبر وشد كيلك يا نصر الله

Mr.GEMYHOoOD يقول...

تشكرى على المحاولة

و سورى لانى مش فى مود يسمح بأى ردود

Alaa يقول...

المشكلة أن في ناس بتشوف موضوع أن الناس اللي بيتضامنوا مع المقاومة الاسلامية رغم أن ملهمش علاقة بالاسلاميين على أنه هبل.

ليه ميتشافش على أنه احترام للآخر و لاختيارات الشعوب لمن يمثلها مثلا؟

سامية يقول...

مثلا!! أو إنه الناس الوحشين "الكخة" دول هما اللي أهدافهم بتتفق مع أهدافنا وهم اللي عندهم عزم وكرامة وبيعملوا حاجة! يبقى نقف ضددهم ليه؟؟ الناس اختارتهم وهم حتى الآن قد الاختيار ونص!

alzaher يقول...

جميل يا سامية
ممكن تدخلي على مدونتي وتقري انطباعاتب الشخصية عما جرى
www.asfoorelsharq.blogpost.com
أخوكي
عمرو

alzaher يقول...

أسف يا سامية
المدونة اهي تاني
http://asfoorelsharq.blogspot.com/
عمرو

غير معرف يقول...

علي حد علمي ...
إحنا وإسرائيل حبايب ..
وفيه سلام ومفيش حرب ..
طب الظباط والعساكر دول ..
بيعملوا إيه في ميدان طلعت حرب ..
دي ناس بتحلم .. بتغني ..
وأجمل ما ف غوناهم .. طالع م القلب
من إمته العشق بيخاف م الموت ...
ومن إمته الحلم بيخاف م الضرب ...
قول يا عم !

علي

هايل يا سامية

بعد الطوفان والجو شبورة يقول...

و لسة ...... لسة

سامية يقول...

لسه يا ياسر فعلا

نسيت أشكرك على قزازة الميه الجميلة اللي ما عرفتش قيمتها غير بعد ما عدت ساعة من الهتاف. القزازة دي سقت ناس كتير قوي
:)
منوّرني
________

شكرا يا علي. الحلم مش بيخاف م الضرب. الحلم بيخاف من اليأس والملل

mai يقول...

جميل جميل جميل.. مدونتك اكثر من رائعة خاصة المدونة الخاصة بالشعر.. هبقى زبونة دايمة.. انتظريني

IBN BAHYA يقول...

أرجوكم يا شباب عايزين نعمل مظاهرة جديدة خالص .. مظاهرة لأخواتنا الحوامل أو حتى من ينتظرن أن يصبحن حوامل .. لتلف كل واحدة على بطنها شريطاً يقول هنا ينمو فدائي .. هنا استشهادي .. هنا مقاوم .. هنا عدو لأمريكا .. هنا خلود .. هنا ثائر .. هنا حر .. لن يتمكن الأمن الجبان من مهاجمة أخواتنا الحوامل .. حوامل بس .. يا ريت تنشروها