٣٠ أكتوبر ٢٠٠٥

خالي من الكولسترول ... مليء بالنوايا الحسنة

بما إني عارفة ان السينما بتاعتنا بقت تغم وقليلا ما باستمتع بفيلم عربي.. لما حد بيقول لي إن فيه فيلم حلو لازم أشوفه بابقى شايلة هم. إمبارح بقى... شوفت فيلم "خالي من الكولسترول" وعجبني جدا. طبعا الفيلم فيه مشاكل كتير وأدواته السينمائية عموما محدودة. يعني لا الإخراج جبار ولا السيناريو جبار ولا الممثلين عايزين أوسكار ولكن الفيلم فيه روح حلوة وفكرة حلوة جدا وقضية مهمة جدا. أنا مش عايزة أحرق الفيلم على اللي ما شافهوش.. لكن زي ماهو واضح من إسمه.. الفيلم بيتكلم عن الإعلانات. أنا بقى باكره الإعلانات لدرجة إني ساعات بيتهيألي ان الإعلانات اللي مالية كوبري 6 أكتوبر بتتحول إلى وحوش وتفضل تتزايد وتكبر في مكانها -زي السحب في قصيدة لأمين حداد- وتاكل من مساحة العمارات ثم الشوارع ثم البشر لغاية ما تخنقني وأنا واقفة في مكاني.
.
مع الأسف الرأسمالية نجحت في أخطر مهماتها: أن تحولنا إلى وحوش استهلاك منومين مغنطيسيا نشتري ونشتري ونشتري من غير ما نعرف بنشتري إيه وبنشتري ليه.
.
الفيلم خالي من الإسفاف والحمد لله ما حسيتش ان حد بيحاول يضحكني بالعافية (وده إحساس بيجيلي من معظم أفلام الكوميدي المصرية) والموسيقى اللي وضعها مودي الإمام أعطت للفيلم نكهة مميزة.
.
النقطة السوداء الوحيدة في الفيلم هي إلهام شاهين مع إنها برضه أدت الدور أحسن من معظم أدوارها الأخرى.
.
الفيلم لم ينجح جماهيريا...

هناك ٦ تعليقات:

Mr-Biboooo يقول...

عموما انا بحب اشرف عبد الباقى
و هو من الكوميديانات اللى بيضحكونى فعلا

4thH يقول...

الفيلم فكرته كويسه .. و فيه طرح جديد و روح حلوه .. لكن تمثيل اشرف عبد الباقي كان مبالغ فيه بطريقه مستفزه

على غير العاده عجبني جدا دور حسن حسني ..
و خلود ادت بشكل جميل جدا

.. محمد ابو سيف ماكانش ممتاز اخراجيا . دايما عنده حتة هياس لازم تظهر في كل افلامه .. ساعات بحس انها استظراف
هو في الجد كويس لكنلم بيحب يعمل كوميديا .. بيصعب عليا
...

فعلا اكتر حاجه عجبتني الاغاني و الموسيقى .. و الاستعراضات اللي اتقدمت ..


و كمان ديكورالفيلم .. عجبني جداالمكتب ( الوكاله ) والخلفيات .. ده غير اللوحات اللي يفترض ان الممثلين رسموها في الفيلم .. شغل جميل جدا


التصوير و الاضاءه و الصوت عاديين جدا .. نفس جو ابو سيف و تقريبا نفس الناس اللي بيشتغلوا معاه

عامة الفيلم حاجه مختلفه .. و يعتبر فوق المتوسط بالنسبه لافلامنا المصريه

R يقول...

كلّ سنة وإنتِ طيّبة وكل الأسرة والعائلة الكبيرة بخير وسلام.

معلش، لم أجد عنوان بريدي لإرسال التهنئة بالعيد...
ـ

Zeryab يقول...

اشترى منى بقى يا ست سامية..خشى فيلم بنات وسط البلد فيلم هايل وجميل ..
كل سنة وانتى طيبة

سامية جاهين يقول...

وانتم طيبين وفي أحسن حال

أنا فعلا نفسي جدا أشوف بنات وسط البلد وكمان دلوقتي انت شجعتني زيادة

يا رب خلّي في اليوم ساعات زيادة

سامية جاهين يقول...

وليد ..تقصد خالي من الكولسترول ولا بنات وسط البلد؟

أنا شوفت بنات وسط البلد زي ما نصحني زرياب.. واتبسطت لكن حصلي زي ما حصل لرضوى كده