24 أكتوبر 2005

الشمس في المعلقة

خلاص... البروفات خلصت والأمسيات خلصت وصحيت النهارده الصبح اكتشفت إن الجرايد مش دواوين شعر ولا حاجة، وان الناس مش بتغني في الشوارع لا غضباً ولا سخرية، وإن "صباح الخير" دي عبارة عادية مش شطرة من بيت في قصيدة لبهاء أو أمين... وإن انا عمري ما ح اكتب شعر.... بس أحلى حاجة في الموضوع إن انا اتأكدت برضه إني ما أقدرش أعيش من غيره ... وإن بهاء شاعر عظيم رغم أنف الجميع وإن أمين شاعري المفضل وإن تميم البرغوثي أفصح إنسان قابلته في حياتي وإن انا لازم أقرأ أكتر لبيرم التونسي... وكمان اتأكدت إن الشعر مش رفاهية وإنه ما بيجيش بالساهل وإنه لو صادق لا يمكن ما يوصلش للناس.. مهما كانت ثقافتهم

بوسة فوق خدك يا بهاء... وتعظيم سلام يا أمين.

إصحى بقى يا عمرو :)


العنوان من قصيدة الساقية لأمين حداد

هناك 9 تعليقات:

ماشى الطريق يقول...

بصى يا ستى أنا كتبت لحد دلوقتى 50 شعر عامية قطعتهم كلهم ما عدا حوالى 3 أو 4 أعمال
المشكلة فى الرضا عما نكتب

hesterua يقول...

بس مين قاللك انك متنفعيش فى الشعر
معلش فى ناس كتير يقال عليهم شعراء
وماليين الساحة
وهما بيكتبوا اتفه ما يكون
وفى كلام بسيط بيقولوا بالبلدى كده بيطلع من القلب ويرشق فى القلب
حاولى وانت اكيد عندك رؤية ومخزون يأهلك انك تعملى حاجة كويسة
شوفى يا سامية كنت بكتب شعر
وكان فى ناس بتصقف ليا
بس كان شعر اهبل
ولما بدات اكتب الشعر اللى انا شايفه شعر من وجهة نظرى
بقى صعب عليا قوى رغم ان انا حاسه
فكتبت الحتة دى

كنت فاكرانى اقدر
كنت فاكر لونى اسمر
كان فى يوم نفسى اقول
كان فى يوم نفسى اعبر
كنت فاكر انى شاعر
كنت فاكر انى قادر
كنت فاكر ان قلمى صوت بلادى
كنت فاكر ان حلمى
حلم عادى
كنت شايف مصر غنوة
كنت سامع
ضحكة حلوة
كنت عاشق لون ولادك
كان فى قلبى كل ناسك
كنت فاكر صوتى واصلك
ياما شفتك جوه حلمى
تفهمينى
تسمعينى
تحضنينى
كنت عاشق للشوارع
كنت عاشق للوشوش
كنت بلضم حرف اسمى
مع المدينة
كنت بستنى النهار
وبكره لينا
كنت بزرع الأمل
جوة العيون
كنت حافظ النشيد
فين ما اكون
كنت فاكر مهما نتباعد
قلبنا واحد
حلمنا واعد
ومهمها بعدنا
هنرجع و نتواعد

حاولى واكيد فى حاجة جميلة هتشوفيها من نفسك

سامية يقول...

كتابة: أهي دي اللي بيسموها المثابرة!بس عندك حق.. المشكلة في الرضا عما نكتب. بس دي مش مشكلتي لأن أنا ما حاولتش أصلا أكتب شعر بجد.. حاسة إنه أكبر مني بكتير وانا مش قد المقام..

أحمد: ماهو اللي انا اكتشفته... إن الشعر أكبر بكتير من إن الواحد يطلع اللي جواه في كلام موزون أو مقفى وخلاص. ده غير اني عندي عقدة: ما بحبش أعمل حاجة وانا مش متأكدة إني ح اقدر أقدم فيها حاجة جديدة أو أتميز فيها. يعني لو ح اكتب شعر نص نص يبقى ما اكتبش أحسن.
وبعدين إنتوا ح تمسكولي على دي؟ :) ما انا بحاول أكتب قصص قصيرة أهو! أحسن من مفيش :)

وعلى رأي بهاء بعض القصص القصيرة ممكن تكون فيها سمات الشعر.

فيه قصص مثلا لبهاء طاهر ويحي الطاهر عبد الله وخوليو كورتاثر ووجارسيا ماركيز وآخرين كتير بتكون عاملة زي ما تكون قصيدة

hesterua يقول...

انا معاكى
وفى شعرا كتير اتشهروا بالشعر المحكى زى الأبنودى مثلا
هو مزيج من الأتنين فعلا
وفى الحاجات اللى عملها عمنا جاهين فى شفيقة ومتولى
مزيج من الشعر والحدوتة وفى النص ممكن تدخلى رايك

Abdelsalam يقول...

الشعر طول عمره تهمه غامضه
وكل شاعر وله جزاء
صلاح جاهين

وكل شاعر وله طعم
ومفيش تعريف محدد للشعر
وفيه شعراء اشتهروا فى التاريخ بقصيده واحده زى ابن زريق البغدادى ومالك بن الريب

وأتصور ان فيه سر فى الشعر بيخلى الواحد يبقى مشدود ليه - الموسيقى والإيقاع والصور والمعانى والحاله النفسية والغنى التراثى
زائد حلاوة الروح
وساعات البراءه والقدره على الإندهاش
وساعات الحكمه ونفاذ البصيره
وساعات يبقى كلام عادى جداً بس شايل جواه كل همومك أو مشاعرك


مش عارف

غير معرف يقول...

وإن بهاء شاعر عظيم رغم أنف الجميع
رغم أنف الجميع
رغم أنف الجميع
رغم أنف الجميع
رغم أنف الجميع
رغم أنف الجميع
رغم أنف الجميع
رغم أنف الجميع

very nice

سامية يقول...

Yes it is very nice, isn't it. Thank you for making my point.

عبد السلام... موضوع تعريف الشعر ده ممكن يكون من رابع المستحيلات.. زي ما انت ذكرت فيه تعريفات كتير وفيه غيرها.. أنا شخصيا كل كلام يستطعمه قلبي وعقلي ووداني مع بعض باعتبره شعر جيد

Doaa Samir يقول...

كم من الكلام المنظوم والمقفى لا يرقى لكلمة شعر!! الواحد يحس إنه بيحدف أذنه وفهمه وروحه كلها بصخور مدببة وهو يقرأه.. في حين فيه كلام عادي في الحياة اليومية يقال عليه "إن من البيان لسحرا".. يسحر من كتر شاعريته مع إنه لا موزون ولا مقفى ولا مقصود.. الأصعب من ده كله إن الواحد "يشعر" من جوه جواه بصدق، حتى وإن لم قد أوتي جوامع الكلم أو حسن البيان، هيظهر في العين وتعابير الوجه وهيهذب الروح ويخليها تخشع
وبالنسبة لي فيه ناس قالت لي لغتك شعرية في القصة القصير، اكتبي الشعر لكني برضه لا أتجرأ على القيام بشيء لا أثق في قدرتي على إتقانه أو الإتيان بجديد.. أحب أحس بالبراح قدامي، لا قافية تحكمني ولا بحر يغرقني

7ader يقول...

عارفه الشعر ده زي ماتسمعي اغنية بصوت فيروز ينغرز جوه جوف قلبك خلايا الجسم تقشعر . انا متأكد ان الناس كلها بتكتب حاجه تلمس الوجدان بس يااما خايفين يكتبوا .. يااما بيكدبوا حتي ف الكتابة فالكلام بيطلع ماسخ
شكراً