كلما ابتعد حلمي عن الواقع وصاحبته موسيقى مبهجة، كلما ابتعدت في نومي عن السحابة السوداء والعيون الزرقاء
والدبابات في الصحراء... استيقظت مذعورة مختنقة.
نصحني الطبيب أن أفكر أفكارا تساعدني على الاسترخاء قبل النوم...فبدأت بتخيل نفسي نائمة على سطح فلوكة تتأرجح على أنغام موجات خفيفة... دهنت غرفتي بدرجة من درجات اللون البنفسجي تبعث في قلبي الهدوء وتشعرني بأن العالم بأكمله مغلف بسحب متناثرة من غزل البنات... أراني واقفة وسط الأشجار في وضع استعداد أمام الكاميرا محتضنة طفلين وبجانبي والدهما الأنيق المبتسم وذراعه ملتف حول خصري ال 12 انجليزي... أشكل الصورة بمعرفتي فأخلع البندقية من يد جدتي وأضع مكانها إبر التريكو وأجلسها على كرسي خشبي هزاز وآخذ القلم من يد أبي لأعطيه بدلا منه فأسا وأجعل الأشجار من حولنا أشجار زيتون... ويكتمل أفيش حلمي السريالي:
إسم الحلم: رحلة أجازة عادية جدا - زي أجازات إسكندرية وشرم الشيخ – إلى القدس
المكان: مكان تاني
الزمان: أي وقت غير دلوقتي
البطلة: يصعب تحديد هويتها لكنها تشبهني و تفوقني جمالا ومقاس خصرها 12 انجليزي
البطل: مصري جميل يفكر في الهجرة
المخرج: ربنا يسامحه ... طلع من بتوع الواقعية السحرية وخرجني من الحلم دخلني في فيلم ومش راضي يكتب نهايته.
هناك ١٣ تعليقًا:
قرات مره ان البنفسجي هو لون العظماء
..
إيه ده! غزل البنات لونه بامبي يا هانم! يمكن لو كنتي دهنتي الأوضة بامبي كان الحلم اختلف :P
ولسة بيحلموا
بايديهم حضنا بعض
وعينيهم حضنا بعض
مع انهم
عمرهم ما شافو بعض
هيثم: بس انا ماعرفش رجالة كتير بيحبوا اللون البنفسجي.. تفتكر ده معناه ان معظم العظماء ستات؟ :)
يا رحاب: حتى في الحلم يا رحاب؟؟ حتى في الحلم حتطلعي تقوليلي بامبي!؟
:p
كتابة:كلام جميل.. كلام معقول .. مااقدرش اقول حاجة عنه
الزمان: أي وقت غير دلوقتي
أكيد غير دلوقت ده وقت الكوابيس مش الاحلام
البطل: مصري جميل يفكر في الهجرة
ومن لايفكر فى الهجرة
انا بحب البنفسجي
:-))))
مرغم عليك يا صبح مغصوب يا ليل
بس باردوا
قدر الزمان يفهمنا
هيثم: عشان كيييييده جاي تقول لي البنفسجي لون العظماء! :p
شادي: ما هو حلم كوابيسي :) أو بمعنى أصح ممكن يكون محاولة للهروب من الكابوس إلى الحلم بس حتى الحلم مش عارفة أحلمه صح. شوفت الخيبة!؟
منور يا أحمد
معلش بس سؤال بجد : هو 12 انجليزي ده يطلع كام بالمصري؟؟؟؟؟
:D
إتناشر انجليزي ده يا سيدي المفروض يكون 40 مصري. حاجة كده قد وسط سعاد حسني في فيلم إشاعة حب :)
تشعرني بأن العالم بأكمله مغلف بسحب متناثرة من غزل البنات
الله!
جميل يا سامية :)
جميل
إنت كمان بتحب غزل البنات؟
:)
شكرا على التشجيع.. جميل أنك لاحظت هذه الجملة بالذات لإني كنت بابتسم وانا باكتبها
ازيك يا سامية، عجبني الحلم بتاعك اوي بصراحة انتي كلك عاجباني من ساعة ما شفتك الأسبوع اللي فات في حفلة اسكندريللا في الساقية، دخلتي قلبي من أول همسة يا بنت الإيه، انا أول مرة أبعتلك هنا بس بقالي 3 ساعات مش عارفة اعمل حاجة من ساعة ما دخلت وسبت شغلي وقاعدة اتفرج ع البلوج بتاعك،الله يسامحك بأى :)
إرسال تعليق