بيان بشأن دعوة المجلس الأعلى للحوار مع الشباب غدا

البيان ده عاملاه مجموعة من الحركات والقوى الثورية بشأن الاجتماع اللي دعا ليه المجلس الأعلى للقوات المسلحة بكرة. أنا موافقة على كل كلمة فيه.

يعني إيه!؟ يعني إيه!؟ - استدعاء ريم وحسام للتحقيق

واضح ان انا لازم أعمل باب أسبوعي على المدونة بعنوان "يعني إيه؟!" من كتر ما بيحصل حاجات ليها العجب في بلدنا دلوقتي! وآخرها استدعاء ريم ماجد (بلدنا بالمصري) والناشط والمدون حسام الحملاوي للتحقيق من قِبل القضاء العسكرية بسبب الحلقة دي.

سلملي على حرية الرأي والإعلام الحر! أي حد ينتقد انتهاكات الجيش - اللي مش بس ليها شهود عيان بالمئات لأ كمان متصورة فيديو - يتم التحقيق معاه على طول. ليه؟ هو احنا عايشين في أنهي زمن؟ هو احنا عملنا ثورة ولا مكرونة باشاميل؟

هنا دعوة للتضامن مع حسام وريم والاعتراض على الاستدعاء من أساسه. ارجوكم المشاركة وإلا نبقى نستاهل اللي يجرالنا بعد كده.

ملاحظات مبدئية عن جمعة 27 مايو

*تحديث: مقال يسري فودة عن مداخلة اللواء ممدوح شاهين على أون تي في:

http://fb.me/GmecrYOz

**

شوية انطباعات سريعة عن الميدان امبارح والأحداث اللي حواليه

1) مبدئيا كده اللواء ممدوح شاهين لازم يرحمنا بقى من زعيقه كل شوية على الفضائيات ولازم حد يفهمه انه لو كان فاكر انه بكلامه بيفيد المجلس العسكري يبقى غلطان. ده بيقوّم الناس عليهم أكتر. لما يطلع امبارح يزعّق لأون تي في عشان كاتبين في شريط الأخبار "مظاهرات حاشدة" يبقى بصراحة كده عيب1 أمال حضرتك يا سيادة اللواء إمتى بتعتبرها حاشدة؟

2) لما أون تي في يستجيبوا فعلا للزعيق ويشيلوا كلمة "حاشدة" من شريط الأخبار يبقى ما يتقالُهمش غير كلمة واحدة: -----!
تحديث: أرسل لي أحد الأصدقاء العاملين بالقناة هذا التفسير:
الصوره دي توريكي الفرق بين تغيير شريحة وتغيير كلمة
http://twitpic.com/53brnv
على فكرة تعديل مليونية جديدة بـ مظاهرة خاشدة كان لأن المراسل أكد ان العدد موصلش مليون مش بمداخلات من حد

والصورة دي توريكي ان كلمة حاشدة اللي معمول عليها القلبان ده كانت موجودة في وصف المظاهرة بعد مكالمة شاهين أصلاً
http://img64.imageshack.us/img64/9340/snap00013t.jpg

3) مظاهرات امبارح كانت لا تقل في العدد إطلاقا عن المليونيات اللي كانت بتبقى وسط الأسبوع أيام الاعتصام من بعد 25 يناير. بل وكان العدد أكبر من يوم 25 يناير نفسه اللي احنا كلنا معترفين انه كان انظلاق الثورة. والعدد اللي نزل ده نزل بالرغم من كل التهديدات والتلميحات بهجوم البلطجية وغياب الحماية والتخوين المباشر والفج من قبل الإخوان المسلمين. يعني العدد كان ممكن يبقى أكبر من كده كمان لو ما كانتش حملة الترويع والشائعات والتخوين شغالة بقالها 3 أيام. ده غير طبعا ان معظم الشباب بيمتحنوا :))

4) عيب قوي لما حزب المصريين الأحرار يكون عنده اجتماع يوم الخميس. يقول فيه لأعضاء الحزب بالحرف الواحد: إحنا مش نازلين. يعني الحزب مش مشارك. وده نقلا عن أحد أعضاء الحزب اللي مش حاقدر أذكر إسمه. وبعدين يطلع ساويرس يقول : لأ ده أنا اللي مش نازل ومش شايف سبب للنزول والحزب يعمل اللي هو عايزه. وبعدين تاني يوم في الميدان تلاقيهم عاملين منصة مع بقية الأحزاب الليبراليه بأحدث المعدات الصوتية وفي أول الميدان. طيب اذا كان الحزب كان ناوي يشارك بفاعلية قوي كده ما قالش للأعضاء بتوعه كده ليه في الاجتماع؟ بل وضللهم وقال لهم إحنا مش نازلين

5) الأجواء في الميدان كانت أكثر من رائعة (بخلاف هتاف: الإخوان فين الميدان أهه. كان بيضايقني لإنه بيحسسني ان احنا كإننا جايين نردح! واحنا المفروض دلوقتي نكون بنجمّع مش بنفرّق. اللي يغلط ياخد على دماغه ماشي. بس مش بالردح

6) الناس نزلت بالرغم من إن القوى "الثورية" ما كانتش متفقة على كل المطالب وده شيء إيجابي في رأيي. لإننا حتى لو مختلفين قدرنا نلاقي أرضية مشتركة مبدئية ومن غير خناق. وكمان لإن ده معناه ان الناس مش راضية .. وده معناه ان الناس فاهمة إنه بيتم الالتفاف حول أهداف الثورة. وطالما الناس فاهمة يبقى ما بيتضحكش عليها حتى لما يكون الإعلام والفلوس والضغط في إيد اللي بيلتفوا حول المطالب.

7) أرفع القبعة للشباب على حماية الميدان من الخارج ومن الداخل. أنا مثلا وانا داخلة في الزحام واحد حاول يستهبل ولسه بالف وباشتمه (كان بِعِد شوية لورا لإنه اتخض لما شتمته بصوت عالي) لقيت شاب جنبي بيقول لي "هو مين!!؟ فينه!؟ فينه؟" وأول ما شاورتله عليه راح مصفر لقيت شباب تانيين جايين من كل ناحية ونزلوا فيه ضرب لما عدموه العافية. الصراحة الراجل صعب علي بس يستاهل!

8) الراجل ده زي العسل :) اتكلمنا معاه كتير بس ما عرفش أصور غير الحته دي

http://www.facebook.com/video/video.php?v=10150276225453033

9) حلقة بلال فضل كانت أكثر من رائعة. قال كل اللي كان نفسنا نقوله. اللي ما شافش الحلقة يشوفها هنا

http://www.youtube.com/watch?v=2vYdKBvgvMs

_________

**تصوير عمرو عبد العليم

مدونة جديدة - سامية ويارا

من 25 يناير وطالع أكتب حاجة ومن قبل ما ارفعها ألاقي يارا قاسم راسمها. أو يارا ترسم رسمة ألاقي نفسي عايزة اكتب وانا بقالي كتير باعافر وخايفة اكتب. يارا قاسم فنانة جميلة وإنسانة أجمل .. عينيها كلها أمل وضحكتها تشرح القلب وفيها طفولة حتلاقيها عند أي فنان حقيقي وخصوصا لو كان رسام كاريكاتير. يارا من أول الثورة رسمت أكتر من 400 صورة وناس كتير كانت بتاخد صورها تعملها صورة للبروفايل على الفيس بوك. الغريبة ان مافيش ولا جريدة طلبت من يارا انها ترسم بانتظام فيها. الله يرحم الزمن اللي كانت فيه مصر بتعرف تحتضن أولادها وتشجعهم.

أنا ويارا قررنا نوحد القوات ونعمل مدونة مع بعض. سامية ويارا بالكلمة والصورة. مش قادرة اوصفلكم انا قد إيه سعيدة باللعبة دي :) أشكر الثورة انها عرفتني عليكي يا يارا.

لازم قانون لتجريم الفتنة وتعريض أمن الوطن للخطر!!

نقولها تاني: القضية مش قضية كنيسة ولا أزهر ومش قضية إعلام وقعدات صلح والمصريين محتاجين يقعدوا مع بعض ويفهموا بعض. مش هو ده الموضوع!

المسألة تتحل بطريقة أسهل وأسرع وأكثر منطقية من كل ده: تجرييييييييييم تعريض الأمن القومي للخطر! أن يتم وضع قانون حاسم ضد كل من يعرض الأمن القومي للخطر لما السلفيين يروحوا يحاصروا الكتدرائية دي مش بلطجة؟؟؟ والتدخل في القضاء والقانون مش بلطجة؟؟ وقطع ودان الناس وحرق البيوت مش بلطجة؟؟ وإيه أخطر على الثورة ، المظاهرات "الفئوية" ولا الفتنة الطائفية؟؟

مافيش أي أولويات أهم من الموضوع ده. ومافيش أي حاجة أخطر على بلدنا منه والمسألة مافيهاش هزار وما تحتملش انتظار!

يا عسكري يا حامينا والمفروض حامي ثورتنا... يا حكومة شرف اللي احنا عمالين نقاوح مع نفسنا عشان ما نفقدش ثقتنا فيها:

عايزين قانون لحماية الأمن القومي من الفتنة!!!!!!!!!!

أنا واسكندريلا جايين من هنا

عمري ما حانسى يوم ما نده لي وقال لي إقري دي كده... كانت قصيدة "ذي سحالي" لفؤاد حداد. قريتها قدامه هو ومحمود حميدة و شفت على وشهم نظرة كل ما بافقد الثقة في نفسي بافكر نفسي بيها. نظرة بتقول: فيه حاجة منوّرة جاية من الناحية دي. نظرة بتقول: ربنا يبارك فيكي يا بنتي. إبتسامته يومها كانت أجمل هدية ممكن أب يديها لبنته. هدية بيمنحها بيها القوة والثقة والرغبة في إنها تكون أحسن.

وكعادة الأبناء دائما .. بناخد آباءنا شيء مسلم بيه وهم أقل ناس بنديهم حقهم لإننا دايما واثقين في حبهم لينا وعارفين انهم مش منتظرين مننا شكر، لكنهم بيدونا من بحرهم اللانهائي من غير ما ينتظروا أي شيء في المقابل.

زعلت من نفسي جدا ومش قادرة أفرح بالنجاح الجميل للفرقة بعد حلقة يسري فودة لإني أدركت اني ما جبتش سيرة الشخص اللي من غيره مش بس ما كانش حيكون فيه اسكندريللا... لأ كمان ما كنتش أنا حكون الشخص اللي انتو شايفينه دلوقتي.

اتكلمنا عن تأثرنا بشعر فؤاد حداد وصلاح جاهين وفن سيد درويش والشيخ إمام وزياد رحباني وما اتكلمناش عن اللي كان بيقعد يقرالنا الشعر ويفهمهولنا. ما اتكلمناش عن اللي طول الوقت كان مؤمن بينا في الوقت اللي ماحدش فيه كان شايفنا. عن اهتمامه بحضور جميع بروفاتنا بالرغم من الإرهاق اللي بيكون فيه كل يوم بعد شغله. ما اتكلناش عن تشجيعه المستمر لينا. ما اتكلمناش حتى عن الأغاني اللي هو كاتبها زي "يحكى أن" وبالعبري الفصيح" و"راجعين" اللي هي أكتر أغاني نالت إعجاب الجمهور مؤخرا. وانا ما اتكلمتش عن شعره اللي أنا وجوزي كنا لما نحب في بعض نقراه لبعض. ما اتكلمتش عن حضنه اللي ساعنا كلنا وجمعنا كلنا ووجهنا في الطريق الصح.

أنا ما اتكلمتش عن أبويا! أبويا الحقيقي مش أبويا بالجينات. أبويا اللي عمري ما احتاجتله وما لقيتهوش. أبويا اللي علمني يعني إيه مقاومة ويعني إيه فن ويعني إيه مقاومة بالفن. أبويا اللي علمني أقرا شعر صلاح جاهين وفؤاد حداد. أبويا اللي شعره كان ملاذي في لحظات حزني وكان أملي في لحظات يأسي.

ما اتكلمتش عن أمين حداد... تخيلوا؟ أنا نفسي مش قادرة أصدق ولا أسامح نفسي على غبائي. بس زي ما قلت.. الظاهر ان احنا اتعودنا ناخد الأمور اللي بتجيلنا من غير تعب - خصوصا حب الآباء - كأمر مسلم بيه. وانا باكتب الكلام ده النهاردة مش بس عشان أشكر أمين. لأ كمان عشان افكر نفسي إن اللي انا فيه النهاردة ده أصله جاي من عند أب مافيش حد في الدنيا يحلم يكون عنده زيّه...

أسماء شهداء السويس

عظّم شهيدك! كل دم يسيل على أرض مصرية عظيم الجاه! فؤاد حداد

ومنيا القمح ماسكه فى ايدين بلبيس

وفى السويس واحد من الشهداء كان اسمه غريب، وكام غريب فى السويس.

من قصيدة الطير والثورة لأمين حداد

دي أسماء شهداء السويس.. لسه لغاية دلوقتي ما عرفناش نجمع صورهم بس على الأقل بنفتكر أساميهم.

ملحوظة: أشكر الصديقة المخرجة دينا حمزة على جمع الأسماء واحنا دلوقتي بنحاول نجمع الصور عشان نعمل لهم صفحة على الإنترنت.

مرحب مرحب بالثوار! التحرير 1 أبريل

أقول لكم إيه؟ مصر كل يوم بتبهرني! أهه أنا لو كان عندي ذرة شك في الأيام اللي فاتت ان الثورة ممكن تتسرق مننا.. النهاردة قلبي اطمن

إحنا لسه راجعين من التحرير والأعداد كبيرة جدا.. ما تقلّش عن مليونيات أيام الاعتصام والصور عندكم شوفوا. والهتافات واضحة وصريحة والمطالب واضحة وصريحة والشعب عارف هو عايز إيه.

أحلى لحظة بالنسبة لي النهاردة كانت لما المسيرة اللي جاية من الجيزة وصلت الميدان. ماشيين بقالهم ساعتين ونص على رجليهم في عز الحر لكن وشوشهم المفرهدة مليانة عزم وإصرار ونور. وكان خالد السيد - من ائتلاف شباب الثورة - في مقدمتهم بيهتف وأول ما وصلوا كلنا هتفنالهم: مرحب مرحب بالثوار!

مرحب فعلا بالثوار... مرحب بيكي يا مصر. بالأحضان يا مصر يا زينة الدنيا!

تحديث: نسيت أقول حاجة لحبايبنا الحلوين بتوع الاستقرار الزائف اللي فلقونا بقالهم أسبوعين وبيتهمونا اننا بنتجاهل الشارع وببنصرف ضد رغبته. أحب اقول لهم: إحنا الشارع! ومصر قدامكم أهه تتحدث عن نفسها. شباب وعمال وفلاحين وناس على باب الله وستات ورجالة (و مش القاهرة بس .. يا ريت تروحوا تشوفوا صور اسكندرية كمان)