كارلوس لطوف - رسوم جديدة تنتقد المجلس الأعلى والمحاكمات العسكرية

http://twitter.com/#!/CarlosLatuff

حلقة عزمي بشارة مع يسري فودة (ومحاضرته في جامعة القاهرة) لازم تتذاكر

تحديث كمان: ممكن تشوفوا هنا محاضرة د. عزمي بشارة في جامعة القاهرة.

تحديث: قامت الصديقة دينا لطفي بتلخيص بعض النقاط الهامة فيما ورد على لسان عزمي بشارة هنا لمن يريد أن يأخذ فكرة سريعة.

حلقة د. عزمي بشارة امبارح: روشتة للثورة... أعطتني أمل ولكن عقلاني. وأفادتني وأمتعتني جدا. مليانة تحليلات مهمة ونصائح أهم. ارجوكم تسمعوا بتركيز يا من صنعتم هذه الثورة لعلكم تجدون في كلامه ما يفيدنا!

اتكلم عن الثورة في مصر بشكل عام ثم الثورات العربية. وعن ثورة مصر تحدث عن المحاكمات وأهميتها وعن غموض المجلس العسكري ومن أهم الحاجات اللي اتكلم عنها استيلاء النخب القديمة على النقاش حول المستقبل. أسيبكم تسمعوا بنفسكم.

الإجابة لسه تونس...

بسم الله الرحمن الرحيم: الإجابة لسه تونس!

إشمعنى غيرتوا منهم أول مرة وقعدتوا تقولوا احنا أرجل من التوانسة! إحنا سبقنا التوانسة! إحنا إحنا... خلاص أرضيتم غروركم؟

إتفرجوا بقى تونس بتعمل إيه:

تونس تنتدب ثلاثة آلاف شرطي جديد وتدربهم على احترام حقوق الإنسان

الحكومة التونسية تقرر اجراء انتخابات المجلس التأسيسي يوم 23 أكتوبر

أعلنت الحكومة الانتقالية في تونس يوم الأربعاء 8 يونيو/حزيران عن موعد إجراء انتخابات المجلس الوطني التأسيسي، في خطوة تمهد لوضع دستور جديد للدولة،

رئيس الوزراء التونسي يطرح امكانية تأجيل الانتخابات

رئيس اللجنة العليا المستقلة للانتخابات في تونس يقترح تأجيل الانتخابات القادمة

تونس: محاكمة بن علي غيابيا مدنيا وعسكريا 20 يونيو

الفلاحين والعمال والطلبة المعتقلين

بجد يبقى عيب قوي بقى لو ما اهتميناش! خذلناهم أول مرة ما ينفعش نخذلهم تاني!

بكرة فيه وقفة قدام مكتب النائب العام للتضامن والمطالبة بالإفراج الفوري عن العمال والفلاحين والطلبة المعتقلين.. شير واتيند.

تحديث: اصدر النائب العام قرارا بالإفراج عن المعتقلين بضمان محل اقامتهم - خلاص الخبر اتأكد. كان لزومه إيه حرقة الدم؟ ولا احنا لازم نهدد بالتظاهر عشان تمشوا بما يرضي الله!

كارلوس لطوف - رسوم جديدة عن مقاطعة إسرائيل

لمن لا يعرف كارلوس لطوف هو فنان كاريكاتير برازيلي ساند الثورة المصرية منذ بدايتها وهو من رسم الصورة الشهيرة لخالد سعيد وهو يمسك مبارك بطرف إصبعه قبل 25 يناير. وكان كارلوس لطوف على اتصال بمجموعات الشباب منذ فترة يمدهم برسوماته المساندة للثورة والتي تم استخدامها أثناء المظاهرات.

في الرابط التالي مجموعة جديدة من الرسوم عن مقاطعة إسرائيل ورسالة من الفنان:

http://www.indybay.org/newsitems/2010/09/04/18657717.php

Dear brothers and sisters-in-arts,

Presented here is a new series on Boycott, Divestment, and Sanctions

(BDS) against Israel. These images are Copyleft, meaning that BDS campaigns all around the world are free to use them in their materials. People are encouraged to reproduce these images on blogs, newspapers, magazines, books, posters, in order to promote the boycott against Israel. Captions are in English but you are free to translate them for your own language.

Thank you.

http://twitter.com/CarlosLatuff

أنا مكسوفة!! وكلنا لازم نبقى مكسوفين!!

تحديث بعد الجلسة: شباب 6 ابريل يؤمنون الفخراني بأجسادهم :)

هي دي مش بلدنا برضه؟ والناس اللي مستبيعة وتاعبة نفسها عشان تجيبلنا حقننا دي ما تستاهلش مننا ان احنا نقف جنبهم؟ الراجل اللي رافع القضية ده عامل عملية في ظهره وبعتوا له بلطجية في الجلسة اللي فاتت وماعندهوش أي حاجة تضطره انه يعمل كل ده. وفعلا بدأ ييأس وبيقول انه حيتنازل عن القضية لو الشعب بقى مش فارقة معاه!!

هو و أمثاله هم الثورة الحقيقية! أرجوكم لا تخذلوهم!

وبعدين احنا دايرين ندوّر على فلوسنا اللي بره في حين اننا لو تعبنا نفسنا شوية - أو حتى بلاش نتعب نفسنا! نقف بس جنب الناس اللي زي الفخراني وبيتعبوا نفسهم بدالنا - حنرجع للبلد بدل الملايين مليارات منهوبة!

أرجوكم تهتموا بالموضوع. أنا عن نفسي ما كنتش أعرف حاجة عنه غير لما قريت آخر نوت كتبتها ياسمين الفخراني بنت حمدي الفخراني بعد المهزلة اللي حصلت لهم في الجلسة الأخيرة.

لينك الإيفنت أهه. نشتغل شوية بقى!

ولو حد مهتم يعرف تفاصيل أكتر عن القضية من محامين أو نشطاء الملفات كلها موجودة هنا.

وأخيرا أحب بس اقول لهذا الرجل المحترم وبنته: إنتم اديتوني أمل وأكدتولي ان فيه ناس مش بس قلبها على البلد، لأ كمان بتقدم كل ما عندها عشان تطهرها وتضمن ان ثورتها دي ما تبقاش مجرد عملية تجميل! ربنا ينصركم.

مظاهرة الفلاحين النهارده

تحديث هام قبل ما تقرا التدوينة: يا ريت ماحدش يدخل يقول لي بيعطلوا البلد وعجلة الإنتاج وبيان الوزارة أقل ما يقال عنه انه مخزي! في كل بلاد العالم المحترمة الإضراب وسيلة مشروعة لإعلان المطالب ودول ناس بقالهم أكتر من ست شهور بيروحوا الوزارة يطالبوا بحقوقهم ومافيش حد سامعهم. اشمعنى مثلا لما شركة طيران زي بريتيش إيرويز تعمل إضراب في انجلترا وتشل حركة الطيران بحالها محدش بيمنعم!! وبتكون طريقة فض اعتصامهم هي الاستجابة لمطالبهم أو على الأقل مناقشتها!!

________________________________

النهاردة اكتشفت بالصدفة من نورا شلبي على تويتر ان الفلاحين بيتظاهروا في شارع القصر العيني مطالبين بحقوقهم. اللي وصلني ان معظم المطالب كانت متعلقة بإيجار الأراضي اللي اصبح فوق طاقة أي فلاح وبحق الفلاحين في امتلاك الاراضي اللي بيفلحوها.

سؤالي هو: ليه ماعرفناش عن المظاهرة دي من بدري؟ مين اللي نسق لها وليه ماحاولوش يتصلوا بالنشطاء عشان يحشدولها عشان الناس دول ما يتسابوش لوحدهم؟

اللي حصل ان عددهم كان قليل وما شاء الله العيسوي جامد في الأمن عندما يتعلق الأمر بالمظاهرات! الأمن المركزي نزل في كامل قوته وفض الاعتصام وبدأ يعتقل من الفلاحين.

والحقيقة دي مش غلطة الأمن بس. دي غلطتنا احنا كمان. عشان احنا مش هناك معاهم نحميهم بالكترة ونساندهم في المطالبة بحقوقهم المشروعة. وده بقى على فكرة مرتبط بمسألة حرب المواقع اللي اتكلمت عنها هنا واللي كتب عنها حسام الحملاوي فيما يخص استمرار الثورة في المصانع هنا.

من الآخر كده وعشان ما اطوّلش عليكم: لو ما رتبناش أولوياتنا ولو ما وقفناش جنب العمال والفلاحين اللي الثورة دي قامت عشان هم مش لاقيين ياكلوا وعيشيتهم عبارة عن ظلم في قهر في قرف، يبقى قولوا على الثورة دي ياللا السلامة.

وخليكم فاكرين ان لولا انضمام العمال والفلاحين في أواخر ايام الاعتصام للثورة ولولا تهديدهم بالدخول في إضراب مفتوح وعصيان مدني ماكانش مبارك مشي ولا شفيق مشي. لو بعناهم

النهاردة نبقى نستاهل اللي يجرالنا!

ملحوظة: تفتكروا لو كان العدد أكبر وكان في وسطهم نشطاء وصحفيين وناس تقدر تساعدهم في تنظيم نفسهم أثناء التظاهرة، تفتكروا كان قدر الأمن يتعامل معاهم بنفس الطريقة ويفض الاعتصام؟

اتفرجوا على صور نورا شلبي هنا: http://yfrog.com/h39uubtbj

وآخرتها يا شرطة!

الداخلية مش ناوية تجيبها البر!
طالب الشرطة المثالي يتراجع عن اعتذاره ويسب المصريين قائلا :” إحنا بنحلق لكو يا هبل وهنفش-- يا شعب”
وبعدين ضباط يعترفوا بالتعذيب لأ وبيتباهوا بيه

وآخرتها!؟؟

وبعدين يطلعوا يهددونا بالفوضى ويخوّفوا الناس ويقولوا لهم عايزين استقرار وأمان. يغور الأمان اللي ييجي على إيد دول! إحنا ما دفعناش دم عشان اي مصري مهما كان يتهان تاني.

ارجوكم اسمعوا الجزء ده من كلام حسام بهجت من حلقة آخر كلام امبارح. واللي ما شفش الحلقة كلها يشوفها ع اليوتيوب عشان كانت حلقة مهمة.

الحياة الحرة في الأحياء

وفى السويس ، واحد من الشهدا كان اسمه غريب ، وكام غريب فى السويس

(من قصيدة "الطير والثورة" لأمين حداد)

احنا اتولدنا عشان نكون شهداء

احنا الحياة الحرة في الأحياء

وحتى شوفي الصور تلقي في جبيننا ضياء

وفي عيوننا نِدا وفي ابتسامنا فدا

(من قصيدة "على لسان الشهداء" لأمين حداد)