٠٩ يناير ٢٠١٢

كلام في السياسة

ماليش كتير في السياسة
لكن بافكّر
ماليش كتير في الكلام 
لكن باعبّر
من قلب مليان حماسة
وباقول كلام في السياسة

باحلم تملي بالسعادة والأمان
باحلم أعيش من غير ما اخاف غدر الزمان
وان جيت ونلت المنى
يصعب عليّا الهنا
من غير ما يتهنوا جميع الناس كمان
ما اسعدش غير ف وطن سعيد من حواليا
سموا الشعور ده حب ولّا اشتراكية
ماليش كتير في السياسة

أوقات أحس كأني على مفترق طريق
أحتار ويصبح قلبي في الأفكار غريق
ولما اشور الجيران
واشاور الخلان
رأي الصواب يظهر جريء وله بريق
واحس رأي حبايبي ينوّر عينيّا
سموا الشعور ده حب ولّا ديمقراطية 
ماليش كتير في السياسة

بيني وبين أيامي حرب ما تنتهيش
وزي كل الناس باموت علشان أعيش
أتمنى اروح عندهم
جهدي على جهدهم
يصبح وجودنا قوة بعد ما كان مافيش
وانا إيش أكون وحدي لولاش بلدي عليّا
سموا الشعور ده حب ولّا تعاونية
ماليش كتير في السياسة

أنا قلبي مليان حماسة 
لكل شيء صادق
ماليش كتير في السياسة
لكن باحب المبادئ!

صلاح جاهين

(من قصيدة "كلام في السياسة" - ديوان عن القمر والطين 1961)

هناك ١١ تعليقًا:

SaMeHaBeLtAgY يقول...

تحفة بجد الله يرحمه لكل زمان ومكان

واحد تحت الصندوق يقول...

الله يرحمه ويحسن اليه .. مش عارف ليه بلاقي نفسي مبتسم كل مابقرأ له قصيده حتى لو كانت قصيده مبكيه .. صلاح جاهين دائما رائع

Othello يقول...

عاش من قال .... وعاش من سمع ... والمجد لمن فعل
عبدالوارث خالد

bo mima يقول...

السلام عليكم ورحمة الله وبركاته
أستاذه سامية جاهين" الفاضلة"
تحية وبعد،
قمت بارسال رسالة لحضرتك بخصوص اقتباس مقطع "سطرين" من أوبريت الليلة الكبيرة للعبقرى صلاح جاهين.. رجاء النظر إلى الرسالة فى الفيس بوك والرد بالإفادة للاهمية القصوى الله يكرمكم.
تحياتى ةتقديرى..
مختار سعد شحاته
mukhtarshehata@hotmail.com

Unknown يقول...

اختيار جميل

نــهـــــــال يقول...

:))))))) الجمال له إللي يحسوه و يوروهولنا صحيح
الله يرحمه

نوال عبد الرحمن يقول...

دي حقيقة اللي اسمها حنان خواسك
http://al-mashhad.com/Articles/39218.aspx

Egypt trend يقول...

بنت ابوكي بصحيح

الصحيفة الصادقة يقول...

مدونة جميلة وكلامك اكثر من رائع لسهولته وسلاسته

اسكندرنيات3013 يقول...

جميله

ربح من الانترنت يقول...

شكراّ ع الموضوع :)