"كفاية" تلاكيك!!

بقدرة قادر تحول موضوع إغلاق مسرح الجنينة إلى تلكيكة للتظاهر! وياريته تظاهر عن إغلاق المسرح.. لأ! دي مظاهرة بروباجاندا لأحمد فؤاد نجم وفرقة نغم مصري، حيث تزعم الحركة المصرية من أجل التلكيك أن أغاني نجم التي تغنيها الفرقة هي السبب في إلغاء حفل "نغم مصري" الذي كان مقرراً تقديمه يوم الخميس الماضي 23 فبراير بمسرح الجنينة. سبحان الله الدولة سابت كل الفرق اللي بتغني أغاني نجم واللي ألعن من أغاني نجم وقررت تقف على نغم مصري! ثانية واحدة، ده فيه حاجة تانية مهمة جداً قررت حركة التلكيك إنها تتغاضى عنها، ألا وهي إن نفس الفرقة دي بنفس الأغاني دي لعبت على مسارح الدولة قبل كده! أي والله! لعبوا في الأوبرا وفي بيت الهراوي، ده غير حفل في المجلس الثقافي البريطاني و عدد لا حصر له من الحفلات في ساقية الصاوي!

أنا مش بادافع عن الدولة ولا أنظمتها ولا باقول انها بتتظلم لا سمح الله. أنا عارفة كويس جداً ان البلوة السودة اللي احنا فيها دي سببها البيرقراطية والفساد و..و..و..و. لكن إحتراماً لعقلي وعقل الناس، أرجوكم ما تجوش تقولوا لي "عشان أحمد فؤاد نجم"! ماهو نجم في كل حتة ومحدش بيكلمه! الموضوع مختلف عن كده والمعلومات اتنقلت غلط! وأبسط مثال إن جريدة الكرامة النهارده في الصفحة الثالثة كاتبين "وأرجعت بسمة الحسيني مديرة مؤسسة المورد الثقافي هذا الإلغاء لأن الفرقة تقدم فقرات للشيخ إمام ونجم" في حين إن بسمة لم تقل ذلك على الإطلاق! هو يعني إشمعنى سايبين كل الكلام اللي بيتقال عن الحكومة وأسياد الحكومة في كل الأمسيات التانية سواءً في مسرح الجنينة أو غيره من المسارح وجايين يمسكوا في "نغم مصري"!؟ نغم مصري! الفرقة اللي بتلعب على مسارح الدولة!! إعقلوها يا جماعة أرجوكم! وعلى العموم مؤسسة المورد الثقافي حتنزل بيان قريباً تشرح فيه ما حدث وبسمة الحسيني مدير المورد حتكون النهاردة في العاشرة مساءً (قناة دريم) للي عايز يسمع مختصر الحكاية من وجهة نظر من عايشها.

وسلملي على حركة كفاية وقل لهم " والنبي كفاية تلاكيك! الشعب مش ناقص! كفاية الحكومة بتتلكك له!"

_______

تحديث: وصلتني الآن معلومة مهمة جداً من مدير فرقة نغم مصري: فرقة نغم مصري لا تؤيد فكرة هذه المظاهرة ولن تشارك فيها وستصدر بيان بذلك على الموقع الخاص بها! فالموضوع طلع بروباجاندا لنجم والحركة المصرية من أجل التلكيك لوحدهم! حاجة تفرح :)