٠٧ ديسمبر ٢٠٠٥

حازم شاهين - *بيغَني مصر بشوق ونحيب


بقالي أسبوع باحاول أكتب عنه ومش عارفة...
يمكن علشان اللي يتكلم عن حازم لازم يكون بيعرف يتكلم بالمزيكا؟
حازم كمان مش بيتكلم كتير.. لكن أول ما يمسك العود شكله بيتغير.. ماعرفش ازاي. زَي ما يكون وِشّه بيطمئن إنه من اللحظة دي مش مطلوب منه يتكلم.. مش محتاج يدخل في حوارات ويتناقش ويقول رأيه، أو يبتسم وهوَّ قلبه واجعه، أو يرحب بالموجودين.

أنا بس عايزة أقول له – ويا رب أعرف أقول – إن مافيش كلام دلوقتي أحلى من اللي بيقوله وهوَّ بيعزف ويغني يا مصر قومي وشِدي الحيل.

أنا آسفة إني ماعرفتش أحكي عن حازم وعن حكايته مع المزيكا وحكاية المزيكا معاه, يمكن لإن اللي بتقوله المزيكا اللي من القلب مش ممكن يقوله الكلام.
أكيد حيجي يوم وتسمعوه وتفهموا قصدي...
* العنوان من قصيدة لأمين حداد بعنوان "سويتش"- ديوان حلاوة الروح

هناك ٨ تعليقات:

Solo يقول...

حازم جالنا أكتر من مرة اسكندرية
تقريبا آخر مرة كانت حفلة مع نصير شمة فى مركز الابداع
تعرفى أحلى حاجات سمعتها منه كانت شوية أغانى لزياد غير جيفارا مات مع واحد تانى اسمه حاجة عبدالله أو عبدالله حاجة مش فاكر

Omar Mostafa يقول...

طب حتة مزيكا، طب صفحة على وب، طب أيتها حاجة تتاكل

حازم أنا شفته لايف مرات قليلة، مرة منهم كان مع عبده داغر وده لوحده شهادة ليه على إنه عازف مميز وفنان، حابب تحكيلنا أكتر عن نشاطه وتجاربه الموسيقية المستقلة، ونطولها ازاي..

ولو مفيهاش غلاسة، لو تعرفي طريقة للاتصال بيه تظبطيني، حابب اعمل معاه حوار لو أمكن.. شكراً.. تـــن تـن تن

سامية جاهين يقول...

ماهو حازم اسكندراني يا سولو
:)
إسكندرية ولادة

وهو فعلا بارع في أغاني زياد لإنه بيحبه جدا وعنده في صوته نبرة تهكمية زي زياد. وأجمل ما فيه التنوع.. دماغه مش قافلة على زياد لوحده أو سيد درويس لوحده أو الشيخ إمام. تلاقي عنده اهتمام وإلمام بكل العلامات المميزة في تاريخ الموسيقى عامة

hesterua يقول...

للأسف انا عمرى ما شفته
بس
متأكد انى هيعجبنى لما اسمعه
واضح ان الذوق واحد

سامية جاهين يقول...

حتة مزيكاوصفحة وب وأي حاجة تتاكل!ههههه ضحكتني بجد يا عمر

ماهو أنا لما بدأت محاولة الكتابة عن حازم كنت عايزة أتكلم عن نشاطه وتجاربه وكده بس معرفتش! إنت الصحفي بقى.. لما تقابله إبقى طلع منه اللي انت عايزه
:)

للأسف أنا ماعنديش أي تسجيلات لحازم.. بس المفروض إنه ح يكون عنده حفلة قريبا في الساقية ح ابقى أقولك عليها
وان كان على الاتصال بيه يا سيدي من العين دي قبل العين دي. إسمحلي بس أستأذنه الأول وانا متأكدة انه ح يرحب لإنه من أجمل صفاته إنه مش "عايش في أدوار"بل بالعكس ساعات باحس انه متواضع زيادة عن اللزوم ..مع إنه والله ده بالذات لو عاش في الدور ما تقدرش تلومه
يمكن ده سبب كمان لانبهاري بيه

أحمد: ح ابقى احاول اسجلك حاجة من الحفلة

egyptaya يقول...

I don`t live in Egypt, so this is the first time I hear about this artist. Does he have any CD in the market? Can I get any of his music on the net?

سامية جاهين يقول...

Egyptaya:

Unfortunately he doesn't. I'll try to record his next concert. I'm not sure how good the quality will be, though.

غير معرف يقول...

اول مرة اسمع حازم كانت في عرض "لازم تعيش المقاومة". ماكنتش متوقعة من فؤاد حداد اجمل من اللي سمعته, وماكنتش متوقعة من مجموعة المؤديين الرائعين كمان اجمل من كدا, لكن اللي بهرني بجد هو حازم. استغراقه الكامل في المزيكا وصوته المميز بحق كان من اجمل الحاجات اللي حصلتلي من وقت طويل. جميل حازم.. واكتر من جميلة مزيكته.. مصر فعلا ولادة..